Ɔtɛmwɛlɔ koka nembetshiyama oko “tshelo yɛnya dilɛmiɛlɔ ndo ngandji le nzambi kɛmɔtshi.” Lo Bible, tɔtɛkɛta takawakambe la tɔ l’ɔtɛkɛta wakafundama Bible ntondo takakadimɔma ɔnɛ “ɔtɛmwɛlɔ” mbeyaka mbela kanyi y’onto lɛnya dilɛmiyɛlɔ di’efula kana layakitshakitsha l’ɛse ka ditongami. (Mat. 28:9) Tɔtɛkɛta tɔsɔ mbeyaka nto nembetshiya tshelo ya ntɛmɔla Nzambi kana jambizambi. (Jni. 4:23, 24) Awui wosukanyi la tɔtɛkɛta tɔsɔ koka nshikikɛ woho wahombatɔ mbokɛma.

Paka Jehowa, Otungi ndo Owandji waheme laadiko dia tshɛ mbahombaso mamema tshɛ lo tshɛ. (Ɛny. 4:10, 11) Sho tɛmɔlaka Jehowa lo nɛmiya lowandji lande ndo lo mbisha lokombo lande kɛnɛmɔ. (Os. 86:9; Mat. 6:9, 10) Ɛtɛ w’awui ehende ɛsɔ, mbuta ate lowandji laheme tshɛ la Jehowa ndo lokombo lande mbele awui woleki tɛkɛtama lo dibuku dia Ɛzɛkiyɛlɛ. Etelo k’ɔnɛ: “Nkum’Olongo Nkumadiɔndjɔ Jehowa” tanemaka mbala 217 lo dibuku dia Ɛzɛkiyɛlɛ to ndo etelo k’ɔnɛ “mbeya dia dimi kele Jehowa,” tanemaka mbala 55.​—Ɛzk. 2:4; 6:7.

Koko ɔtɛmwɛlɔ aso bu tsho nsaki kɛmɔtshi konga l’onto, koko ekɔ ɔtɛmwɛlɔ wa mɛtɛ walɔmba dia nsala dui dimɔtshi. (Jak. 2:26) Etena kakimɔso lɔsɛnɔ laso le Jehowa, sho tshikaka dɔkɔlɔkɔ dia tayowokitanyiyaka l’awui tshɛ wa lo lɔsɛnɔ laso oko wende Nkum’Olongo ndo tayɛnyaka dilɛmiɛlɔ di’efula lo lokombo lande. Tohɔ dia lo okadimwelo ande lo ohemba wa sato, Yeso akɛdika ɔtɛmwɛlɔ la “olimu w’ekila.” (Mat. 4:10) Oko weso atɛmɔdi wa Jehowa, tekɔ lo nomɔlomɔ dia mbokambɛ. * (Eoh. 10:12) Sho kambɛka Nzambi kaso olimu w’ekila etena kayashaso lo awui wendana mbala kakɔ ɔtɔi l’ɔtɛmwɛlɔ aso ndo walɔmba dia ndjahombia. Awui akɔna?

Olimu w’ekila salemaka lo toho efula tele tɔ tshɛ tekɔ la nɛmɔ lo washo wa Jehowa. Sho kambaka olimu w’ekila etena kasambishaso anto akina, kɔtɔso lo nsanganya lo Mbalasa kaso ka Diolelo ndo etena kalɔngɔsɔlaso kana kakaso ahole aso wa nsanganya. Ndo nto, sho kambaka olimu w’ekila etena kasalaso ɔtɛmwɛlɔ wa lo nkumbo, kasukɛso olimu wa nkimanyiya asekaso ambetawudi wele lo dihombo, kayakimɔso la lolango lo nsanganya yaso ya weke kana dia nkamba lo Bɛtɛlɛ. (Hɛb. 13:16; Jak. 1:27) Naka ɔtɛmwɛlɔ wa pudipudi monga dui dioleki ohomba lo timba ndo l’etema aso, kete tayokambaka “olimu w’ekila la yanyi ndo l’otsho.” Sho ngɛnangɛnaka dia ntɛmɔla Nzambi kaso Jehowa!​—Ɛny. 7:15.