An pagsingba mahimo mangahulogan han “buhat han pagpakita hin respeto ngan gugma ha usa nga dios.” Ha Biblia, an orihinal nga mga pulong nga iginhubad nga “pagsingba” mahimo magpasabot hin pagpakita hin daku nga respeto, o pagpasakop, ha mga linarang. (Mat. 28:9) Mahimo liwat ito maghulagway hin relihiyoso nga buhat para ha Dios o ha bathala. (Juan 4:23, 24) Makikita ha konteksto kon paonan-o ito angay sabuton.

Hi Jehova la, an Maglalarang ngan Soberano han Uniberso, an angay tagan han aton eksklusibo nga debosyon. (Pah. 4:10, 11) Ginsisingba naton hiya pinaagi ha pagrespeto ha iya pagkasoberano ngan pagpasidungog ha iya ngaran. (Sal. 86:9; Mat. 6:9, 10) Inin duha nga tema​—an pagkasoberano ni Jehova ngan an iya ngaran—​ginpapabug-atan ha libro han Ezekiel. An mga pulong nga “Jehova nga Soberano nga Ginoo” ginagamit hin 217 ka beses ha Ezekiel pa la, ngan an mga pulong nga ‘makikilala nga ako hi Jehova,’ 55 ka beses.​—Ezek. 2:4; 6:7.

Kondi an aton pagsingba diri pag-abat la; lugod, an tinuod nga pagsingba nag-uupod hin buhat. (San. 2:26) Han nagdedikar kita kan Jehova, nagsaad kita nga ha tanan nga bahin han aton kinabuhi, susugton naton hiya sugad nga aton Soberano ngan rirespetuhon gud an iya ngaran. Hinumdumi nga ha baton ni Jesus ha ikatulo nga pagsulay, iginpakita niya nga an pagsingba konektado ha “sagrado nga pag-alagad.” (Mat. 4:10) Sugad nga magsiringba ni Jehova, karuyag gud naton mag-alagad ha iya. * (Deut. 10:12) Naghahatag kita hin sagrado nga pag-alagad ha iya kon nakikigbahin kita ha mga buruhaton nga direkta nga may kalabotan ha aton pagsingba ngan nag-uupod hin pagsakripisyo. Ano nga mga buruhaton?

May iba-iba nga klase han sagrado nga pag-alagad, ngan ito ngatanan presyoso kan Jehova. Nag-uupod ito han pagsangyaw, pakigbahin ha mga katirok ha aton Kingdom Hall, ngan pagmintinar ngan pagtukod han aton mga katirokan. Upod liwat hito an pakigbahin ha pagsingba han pamilya, pagsuporta ha buruhaton nga pagbulig ha nanginginahanglan nga kabugtoan, pagboluntaryo ha aton mga kombensyon, o pag-alagad ha Bethel. (Heb. 13:16; San. 1:27) Kon an aton hunahuna ngan kasingkasing nakasentro ha putli nga pagsingba, maghahatag kita hin “sagrado nga pag-alagad . . . ha adlaw ngan gab-i.” Nalilipay gud kita ha pagsingba ha aton Dios nga hi Jehova!​—Pah. 7:15.