KAHON 1B
Sumaryo kan Ezekiel
An libro nin Ezekiel puwedeng banga-bangaon arog kan minasunod:
KAPITULO 1 SAGKOD 3
Kan 613 B.C.E., mantang nag-iistar kaiba kan mga Judio na idinistiyero, o puwersahan na dinara sa Babilonya, nakahiling si Ezekiel nin mga bisyon hali ki Jehova asin isinugo siya na magpropesiya sa mga Judio na nakaistar sa may salog nin Kebar.
KAPITULO 4 SAGKOD 24
Sa pag-ultanan kan 613 asin 609 B.C.E., naghayag si Ezekiel nin propetikong mga mensahe na an panginot na laog manungod sa paghukom laban sa Jerusalem asin sa rebelde saka idolatrosong mga namamanwaan kaiyan.
KAPITULO 25 SAGKOD 32
Puon 609 B.C.E., an taon na diyan pinunan an huring pagsalikop kan mga Babilonyo sa Jerusalem, an mensahe nin paghukom ni Ezekiel bako nang para sa Jerusalem kundi para na sa nakapalibot na mga kaiwal na nasyon—an Ammon, Edom, Ehipto, Moab, Filistia, Sidon, asin Tiro.
KAPITULO 33 SAGKOD 48
Puon 606 B.C.E., mantang gaba an Jerusalem saka an templo kaiyan na ginatos na kilometro an rayo, nagpokus si Ezekiel sa mensahe nin paglaom—an nakakapukaw sa buot na pagbabalik kan dalisay na pagsamba sa Diyos na Jehova.
Kaya an libro nin Ezekiel isinurat sigun sa pagkasurunod-sunod kan mga pangyayari asin uyon sa tema. An mga propesiya manungod sa paglaglag sa Jerusalem asin sa templo kaiyan mas inot na sinambit kisa sa kadaklan na propesiya manungod sa pagbabalik kan dalisay na pagsamba. Angay sana iyan, huling dai magkakaigwa nin mga propesiya manungod sa pagbabalik kun dai napundo an pagsamba sa templo.
Saro pa, an mga propesiya ni Ezekiel laban sa nakapalibot na mga kaiwal na nasyon (kapitulo 25 sagkod 32) nasa tahaw kan mga mensahe niya nin paghukom laban sa Jerusalem saka kan mga propesiya manungod sa pagbabalik kan dalisay na pagsamba. Manungod sa mga mensahe ni Ezekiel nin paghukom sa mga nasyon, nagkomento an sarong iskolar: “Angay an mga iyan para ipahiling an pagbabago hali sa pagpahayag kan kaanggutan nin Diyos pasiring sa pagkahirak Niya sa Saiyang banwaan, huling an pagpadusa sa mga kaiwal ninda parte kan pagliligtas Niya sa Saiyang banwaan.”
