AKRABATSA 1B
Ezekiel Wolo Lɛ Mli Saji
Abaanyɛ ajara Ezekiel wolo lɛ mli awo fãi ni nyiɛ sɛɛ nɛɛ amli:
YITSO 1 KƐYASHI 3
Yɛ afi 613 D.Ŋ.B., be ni Ezekiel yɔɔ Yudafoi ni aŋɔ amɛ nom kɛtee Babilon lɛ ateŋ lɛ, Yehowa jie ninai etsɔɔ lɛ ni ewó lɛ gbalɔ ehã Yudafoi ni yɔɔ Kebar faa lɛ naa lɛ.
YITSO 4 KƐYASHI 24
Kɛjɛ afi 613 kɛyashi afi 609 D.Ŋ.B. lɛ, Ezekiel gba eshi Yerusalem kɛ mɛi ni yɔɔ jɛmɛ lɛ, ejaakɛ amɛtse Yehowa hiɛ atua ni amɛmiijá amagai.
YITSO 25 KƐYASHI 32
Kɛjɛ afi 609 D.Ŋ.B., ni ji afi ni Babilonbii lɛ bawo Yerusalem he ka naagbee nɔ kwraa lɛ, Ezekiel egbaaa eshiii Yerusalem dɔŋŋ, shi moŋ egba eshi Amon, Edom, Ejipt, Moab, Filistia, Sidon, kɛ Tiro, ni ji Yudafoi lɛ ahenyɛlɔi ni bɔle amɛ lɛ.
YITSO 33 KƐYASHI 48
Kɛjɛ afi 606 D.Ŋ.B., be ni Yerusalem kɛ sɔlemɔ shĩa lɛ etsɔ koikoi, ni Yudafoi lɛ kɛ amɛmaŋ lɛ teŋ ejekɛ waa lɛ, Ezekiel shiɛ sane ko ni kɔɔ Yehowa Nyɔŋmɔ jamɔ krɔŋŋ lɛ shishi ni abaato ekoŋŋ lɛ he, ni sane nɛɛ hãa anáa hiɛnɔkamɔ.
No hewɔ lɛ, wɔbaanyɛ wɔkɛɛ akɛ ato Ezekiel wolo lɛ naa yɛ be mli ni emli saji lɛ tee nɔ lɛ anaa kɛ agbɛnɛ hu yɛ saji ahe ni amɛkɔɔ lɛ anaa. Gbalɛi ni kɔɔ Yerusalem kɛ sɔlemɔ shĩa ni yɔɔ jɛmɛ lɛ hiɛ ni abaakpãtã lɛ he lɛ baa dani gbalɛi ni kɔɔ jamɔ krɔŋŋ shishi ni abaato ekoŋŋ lɛ he lɛ ateŋ babaoo baa. Nilee yɛ mli waa akɛ ato naa nakai, ejaakɛ ja jamɔ ni ajáa Nyɔŋmɔ yɛ sɔlemɔ shĩa lɛ mli lɛ sɛɛ efo dani abaanyɛ agba akɛ abaato shishi ekoŋŋ.
Kɛfata he lɛ, gbalɛi ni Ezekiel gba eshi Yudafoi lɛ ahenyɛlɔi ni bɔle amɛ lɛ (yitso 25 kɛyashi 32) yɛ gbalɛi ni egba eshi Yerusalem lɛ kɛ egbalɛi ni kɔɔ jamɔ krɔŋŋ ni abaato shishi ekoŋŋ lɛ he lɛ teŋ. Biblia he nilelɔ ko wie yɛ gbalɛi ni Ezekiel gba eshi jeŋmaji lɛ ahe lɛ he akɛ: “Gbalɛi nɛɛ hãa anaa akɛ, be ni agba gbalɛi ni tsɔɔ bɔ ni Nyɔŋmɔ mli efu ewebii lɛ sɛɛ lɛ, agba gbalɛi ni tsɔɔ bɔ ni ebaana amɛ mɔbɔ lɛ hu, ejaakɛ gbalamɔ ni Nyɔŋmɔ baagbala ewebii lɛ ahenyɛlɔi lɛ atoi lɛ fata nibii ni ebaafee kɛkpɔ̃ amɛ lɛ ahe.”
