TE BWAOKI N REIREI 1B
Kabwarabwaraan Etekiera
E bae n tibwatibwaaki te boki ae Etekiera nakoni mwakoro aikai:
MWAKORO 1 NAKON 3
N 613 B.C.E. ni menan Etekiera i buakoia I-Iutaia ake taenikai i Baburon, ao e nori miitara mairoun Iehova ao e mwiokoaki bwa e na taetae ni burabeti nakoia I-Iutaia ake a maeka i rarikin te karaanga ae Keebara.
MWAKORO 4 NAKON 24
I marenan 613 ao 609 B.C.E., e a taekin taetae ni burabeti Etekiera aika angiini kanoana boni motikan taekan Ierutarem ma kaaina aika karitei, ao aika taromaurii bouannanti.
MWAKORO 25 NAKON 32
E moanaki n 609 B.C.E., are e a waakina iai ana kabanea n tai Baburon ni buakana Ierutarem, ao e a tii bitaki naba te motikitaeka are e taekinna Etekiera bwa ai tiaki nakon Ierutarem ma ai nakoia natannaomata ake i rarikina ake a kairiribai ake Ammon, Etom, Aikubita, Moaba, Biritia, Titon, ao Turo.
MWAKORO 33 NAKON 48
E moanaki n 606 B.C.E. ngke e a wene n uruaki Ierutarem ma ana tembora n te tabo ae irabubua te maire raroana, ao e a kabotoa ana rongorongo Etekiera i aon te kantaninga ae kakukurei ae kaineti ma kaokan te taromauri ae itiaki ibukin Iehova ae te Atua.
Ngaia are e karinanaki raoi kanoan te boki ae Etekiera ni kaineti ma baike a moan riki, ao ni kaineti naba ma te rongorongo teuana ma teuana. A nako moa taetae ni burabeti ibukini kamaunaan Ierutarem ma ana tembora, imwain taetae ni burabeti aika bati ibukini kaokan te taromauri ae itiaki. E eti teina anne bwa a aki kona n taekinaki taetae ni burabeti ibukini kaokan te taromauri ae itiaki, ngkana e aki mauna moa te taromauri n te tembora.
A taekinaki naba ana taetae ni burabeti Etekiera n ekiianako natannaomata ake i rarikia ake taani kairiribai (mwakoro 25 nakon 32) imwin taekinani motikan taekan Ierutarem ao imwain taetae ni burabeti ibukini kaokan te taromauri ae itiaki. E taku te tia rabakau temanna ni kaineti ma ana taetae ni burabeti Etekiera n ekiianako natannaomata: “A nakoraoi raoi aroni bibitakin tein taetae ni burabeti aikai, man taekan unin te Atua nakon nanoangaaia ana aomata, ibukina bwa katuuaaeaia taani kairiribai akekei, boni kanoan naba ana kakamaiu nakoia ana aomata.”
