APOTIN NUPINPLỌN TỌN 1B
Bladopọ Owe Ezekiẹli Tọn
To paa mẹ, owe Ezekiẹli tọn sọgan yin mimá do adà he bọdego ehelẹ mẹ:
WETA 1 JẸ 3
To 613 J.W.M., whenue Ezekiẹli tin to Babilọni to pọmẹ hẹ Ju he to kanlinmọgbenu to finẹ lẹ, e mọ numimọ delẹ gando Jehovah go bo yin azọ́ndena nado dọ dọdai na Ju he nọ nọ̀ tọ̀sisa Kẹbali kọ̀n lẹ.
WETA 4 JẸ 24
To gblagbla owhe 613 jẹ 609 J.W.M. tọn mẹ, Ezekiẹli lá owẹ̀n dọdai tọn lẹ he suhugan yetọn bẹ whẹdida Jehovah tọn hẹn sọta Jelusalẹm po tòmẹnu etọn atẹṣitọ he nọ sẹ̀n boṣiọ lẹ po.
WETA 25 JẸ 32
Bẹsọn 609 J.W.M., yèdọ owhe he mẹ Babilọninu lẹ bẹ osladido godo tọn yetọn lẹdo Jelusalẹm jẹeji te, owẹ̀n whẹdida tọn Ezekiẹli tọn lilẹ́ sọn Jelusalẹm ji jẹ akọta kẹntọ he lẹdo Jelusalẹm pé lẹ ji—enẹ wẹ Amọni, Edomi, Egipti, Moabi, Filisti, Sidoni po Tile po.
WETA 33 JẸ 48
Bẹsọn 606 J.W.M., whenue Jelusalẹm po tẹmpli etọn po ko tin to ninọmẹ vọjijẹ tọn mẹ to fihe dẹn do Ezekiẹli na kilomẹtlu kanweko susu, e ze ayidonugo do owẹ̀n todido tọn de ji—yèdọ hẹngọwa jiawu sinsẹ̀n-bibasi wiwe-ṣeke Jehovah Jiwheyẹwhe tọn.
Enẹwutu, mí sọgan dọ dọ nudọnamẹ he tin to owe Ezekiẹli tọn mẹ lẹ yin tito debọdo-dego podọ sọgbe hẹ hosọ he ji yé dọhodo. Dọdai he gando vasudo Jelusalẹm po tẹmpli etọn po tọn go lẹ sọawuhia jẹnukọnna suhugan dọdai he gando hẹngọwa sinsẹ̀n-bibasi wiwe-ṣeke tọn go lẹ. E sọgbe domọ, na whẹpo dọdai nido yin didọ gando hẹngọwa go, sinsẹ̀n-bibasi lọ dona ko doalọte to tẹmpli mẹ.
Humọ, dọdai he Ezekiẹli dọ sọta akọta kẹntọ he lẹdo Jelusalẹm pé lẹ (weta 25 jẹ 32) sọawuhia to owẹ̀n whẹdida tọn he e lá sọta Jelusalẹm po dọdai he gando hẹngọwa sinsẹ̀n-bibasi wiwe-ṣeke tọn go lẹ po ṣẹnṣẹn. Weyọnẹntọ de dọ gando owẹ̀n whẹdida tọn he Ezekiẹli lá sọta akọta lọ lẹ go dọmọ: “Homẹbibiọ dagbe de wẹ yé yin nado tọ́n sọn owẹ̀n homẹgble Jiwheyẹwhe tọn ji wá lẹblanu he E na dohia omẹ Etọn lẹ ji, na yasanamẹ he na wá kẹntọ yetọn lẹ ji lọ yin apadewhe nuyiwa Jehovah tọn nado tún omẹ Etọn lẹ dote tọn.”
