LUPANGU YA MVUTUKILU 1B
Mukanda ya Ezekiele na Bunkufi
Beto lenda kabula mukanda ya Ezekiele mutindu yai:
KAPU 1 TII NA KAPU 3
Na mvu 613 N.T.B., ntangu Ezekiele vandaka kuzinga na kati ya Bayuda yina bo nataka na kimpika na Babilone, yandi monaka bambona-meso ya Yehowa mpi bo pesaka yandi mukumba ya kuzabisa mambu yina ta salama na Bayuda yina vandaka kuzinga pene-pene ya nzadi Kebare.
KAPU 4 TII NA KAPU 24
Banda na mvu 613 tii na mvu 609 N.T.B., Ezekiele zabisaka bansangu yina vandaka kutadila ntete-ntete lusambisu sambu na Yeruzalemi mpi bantu na yo yina kolamaka mpi yina vandaka kusambila biteki.
KAPU 25 TII NA KAPU 32
Banda na mvu 609 N.T.B., mvula yina basoda ya Babilone yantikaka kuziunga Yeruzalemi na mbala ya nsuka, Ezekiele kumaka kuzabisa nsangu ya lusambisu sambu na makanda ya bambeni yina vandaka na nziunga ya Yeruzalemi—Amoni, Edomi, Ezipte, Moabi, Filistia, Sidoni, mpi Tire.
KAPU 33 TII NA KAPU 48
Banda na mvu 606 N.T.B., Yeruzalemi ti tempelo na yo vandaka ya kubwa mpi yo vandaka ntama kibeni ti kisika yina Ezekiele vandaka kuzinga. Ata mpidina, yandi ke tubila nsangu ya ke pesa kivuvu, disongidila mutindu Yehowa Nzambi ta vutula na kiese yonso lusambu ya bunkete.
Bo me sonikaka mukanda ya Ezekiele na kulanda ndonga yina mambu salamaka mpi na kutadila mambu yina yo ke tubila. Bambikudulu ya me tala kubwa ya Yeruzalemi mpi tempelo na yo kele na ntwala ya bambikudulu mingi ya ke tubila mutindu Nzambi ta vutula lusambu ya bunkete. Yo kele mpidina sambu bambikudulu yai ke monisa nde lusambu vandaka kusalama diaka ve na tempelo.
Diaka, bambikudulu ya Ezekiele sambu na makanda ya bambeni yina vandaka na nziunga (kapu 25 tii na kapu 32) kele na nima ya bansangu na yandi ya lusambisu sambu na Yeruzalemi mpi na ntwala ya bambikudulu ya ke tubila mutindu Nzambi ta vutula lusambu ya bunkete. Ntangu muntu mosi ya mayele ke tubila bansangu ya lusambisu ya Ezekiele sambu na makanda, yandi ke tuba nde: “Yo ke tubila ntete nsangu ya me tala makasi yina Nzambi wilaka bansadi na yandi mpi na nima mawa yina yandi wilaka bo, sambu ndola yina yandi pesaka bambeni na bo kele na kati ya mambu yina yandi salaka sambu na kugulusa bansadi na yandi.”
