KAKITENGULUZHA MWALUMBULULWA BISHINKA 1B
Biji mu Buku wa Ezikyo
Twakonsha kwabanya buku wa Ezikyo mu mbaji yalondelapo:
KITANGO 1 KUFIKA KU 3
Mu 613 B.C.E., Ezikyo waikalanga pamo na Bayudea bakwabo bo batwajile mu buzha ku Babilona. Yehoba wamumwesheshe bimwesho ne kumupa mwingilo wa kuya na kwaula ku Bayudea baikalanga ku mukola wa Keba.
KITANGO 4 KUFIKA KU 24
Ezikyo waawile bungauzhi pakachi ka mwaka wa 613 ne 609 B.C.E., bwaambilenga pa luzhachisho lwaishilenga pa muzhi wa Yelusalema mambo basatukile ne kutendeka kupopwela bankishi.
KITANGO 25 KUFIKA KU 32
Mu 609 B.C.E., bena Babilona balukukile muzhi wa Yelusalema japeleleko. Ezikyo popo atendekele kwaula bintu bikamwekela bena Amonyi, bena Edomu, bena Ijipita, bena Moabu, bena Filishitiya, bena Shidona ne bena Tila bajinga balwanyi ba bena Yelusalema.
KITANGO 33 KUFIKA KU 48
Mu 606 B.C.E., Muzhi wa Yelusalema saka aonaika kala, Ezikyo watendekele kwaula byambo bya kubwezha bupopweshi bwa kine bwa Yehoba Lesa.
Buku wa Ezikyo wanembwa monka mwalondakena bintu byamwekelenga kabiji ne kwesakana na kyo babena kwambapo. Bungauzhi bwaamba pa pakonaunwa kwa Yelusalema ne nzubo ya Lesa bwanembwa patanshi saka bakyangye kunemba bungauzhi bwaamba pa kubwezha kwa bupopweshi bwa kine. Akino kibena kulumbulula’mba bungauzhi bwaambilenga pa kubwezha kwa bupopweshi bwa kine, bwanembelwe saka baleka kala kupopwela pa Nzubo ya Lesa.
Bungauzhi bwaawile Ezikyo bwaamba ne pa balwanyi bebazhokolokele (kitango 25 kufika ku 32). Wibwambile saka aula kala luzhachisho lwaishilenga pa Yelusalema bino saka akyangye kwaula byambo bya kubwezha bupopweshi bwa kine. Shayuka umo waambile pa bungauzhi bwaawile Ezikyo pa byamwekejile bisaka bya bantu amba: “Uno buku bamunemba kwesakana na monka mwamwekejilenga bintu kutendekelapo na byambo bya lukabisho, bino palondela byambo byaamba pa lusa Lesa lo aubijile bantu banji pa kwibapokolola ne kukambula balwanyi babo.”
