KAZUBU KA 1B
Ngenyi minene idi mu mukanda wa Yehezekele
Mu bulelela, tudi mua kukosolola mukanda wa Yehezekele mu bitupa bidi bilonda ebi:
NSHAPITA 1-3
Mu 613 K.Y., pavua Yehezekele munkatshi mua bena Yuda bavuabu baye nabu mu Babilona, wakamona Yehowa mu bikena kumona. Yehowa kumupesha mudimu wa kuambila bena Yuda bavua ku musulu wa Kebâ mêyi a buprofete.
NSHAPITA 4-24
Mu bidimu bia pankatshi pa 613 ne 609 K.Y., Yehezekele wakamba mêyi a buprofete avua atangila nangananga dilumbuluisha dia Yelushalema ne dia benamu bavua bantomboji batendeledi ba mpingu.
NSHAPITA WA 25-32
Kutuadijila mu 609 K.Y., tshidimu tshia ndekelu tshivua bena Babilona bakuate Yelushalema, Yehezekele wakafila mukenji wa dilumbuluisha uvua utangila tshimenga tshia Yelushalema ne bisamba bia baluishi bivua bitshinyunguluke; ke tshia Amona, Edome, Ejipitu, Moaba, Peleshete, Sidona, ne tshia Tulo.
NSHAPITA WA 33-48
Kutuadijila mu 606 K.Y., bu muvua Yelushalema ne ntempelo wende bikavua bishale bibundu bikale kule menemene, Yehezekele wakatamba kuambila bantu mukenji wa ditekemena uvua utangila dijadikulula dia ntendelelu mukezuke wa Yehowa Nzambi.
Nunku mukanda wa Yehezekele mmufunda bilondeshile malu adimu ne bikondo bivuawu menzeke. Wakatuadija ne milayi ya buprofete ivua itangila dibutuka dia Yelushalema ne ntempelo wende, pashishe kuakulaye bua dijadikulula dia ntendelelu mukezuke. Bidi biumvuika bualu kavua mua kuamba mêyi a buprofete a dijadikulula dia ntendelelu mukezuke bikalaye kavua munyanga to.
Bualu bukuabu, mêyi a buprofete avua Yehezekele muambe bua bisamba bia baluishi bivua binyunguluke Yelushalema (nshapita wa 25-32), uvua muambe yeye mumane kuakula bua malumbuluisha avua atangila Yelushalema, ne kumpala kua kuakulaye bua dijadikulula dia ntendelelu mukezuke. Mumanyi wa malu a mu Bible wakamba bua mêyi a Yehezekele a dilumbuluisha bisamba bikuabu ne: “Adi bu tshilamba pankatshi pa mêyi avua akula bua muvua Nzambi mukuatshile bantu bende tshiji ne avua akula bua muvuaye mubafuile luse, bualu dinyokibua dia baluishi babu abu divua tshitupa tshia lupandu lua bantu bende.”
