LIPWATA 1B
Kulumbununa Mukavatu Vishina VyamuMukanda waEzekele
Tunahase kwamba ngwetu mukanda waEzekele vaupangununa muvihanda vino:
KAPETULU 1 SWI NAKU 3
Mu 613 B.C.E., Ezekele atwaminenga hamwe navakwavo vafunge vavaYuleya muMbavilone, kaha amwene vyakumumwenesa vyakuli Yehova nakumutuma apolofwete kuli vaYuleya vaze vatwaminenga kukalwiji Kevale.
KAPETULU 4 SWI NAKU 24
Kufuma mu 613 nakuheta mu 609 B.C.E., Ezekele apolofwetele chikuma vyakusopesa Yelusalema navatu vatwaminengamo mwomwo yakulemesa makombelo.
KAPETULU 25 SWI NAKU 32
Kuputuka vene mumwaka wa 609 B.C.E., omu vaka-Mbavilone vahakile Yelusalema muchingombela kamakumishilo, Ezekele aputukile kuhanjika vyakusopesa mafuchi avaka-kole javo aze avajingilikile akufwana nge Amone, naEtome, naEjipitu, naMowave, naFwilishite, naShitone naTule.
KAPETULU 33 SWI NAKU 48
Mu 606 B.C.E., Ezekele aputukile kuhanjika vyalutalililo navyakukindulwisa kulemesa chamuchano. Halwola kana Yelusalema natembele yapwilemo hivanavinongesa lyehi.
Mukanda waEzekele vausoneka kweseka nomu vyuma vyasolokele nomu vyalikavangijilililemo vihande. Upolofweto wakuvuluka kunongesa Yelusalema natembele yayo valivangile kuuhanjika shimbu kanda vahanjike upolofweto wauvulu wakukindulwisa kulemesa chamuchano. Echi chatamo mwomwo upolofweto wakukindulwisa kulemesa chamuchano wasolwele nge vatu valitwaminyinyine kulemesa Kalunga hatembele.
Ezekele alivangile kupolofweta vyakunongesa Yelusalema numba apolofwete vyakunongesa mafuchi avaka-kole javo aze avajingilikile (kapetulu 25 swi naku 32), kaha apolofwetele jino vyakukindulwisa kulemesa chamuchano. Mutu umwe uze alinangula chikuma, ahanjikile haupolofweto waEzekele wakusopesa vaka-mafuchi ngwenyi: “Upolofweto kana wasolwele omu Kalunga anongesele vaka-kulikanga, nomu asolwelele keke vatu jenyi, mwomwo kunongesa vaka-kole javo chalingishile mangana vavasokole muufunge.”
