IBHOKSI LOKUFUNDISA 1B
Isethulo Sencwadi KaHezekiyeli
Nasele siyibeka kuhle, incwadi kaHezekiyeli ingahlukaniseka nganasi indlela:
ISAHLUKO SOKU-1 UKUYA KWESESI-3
Ngo-613 B.C.E., ngesikhathi ahlangana namaJuda adingiselwe eBhabhiloni, uHezekiyeli ubona umbono kaJehova, umyala bona aphorofide emaJudeni ahlala nca ngemlanjeni iKebari.
ISAHLUKO SESI-4 UKUYA KWESAMA-24
Phakathi kwaka-613 no-609 B.C.E., uHezekiyeli wethula umlayezo wesiphorofido onesahlulelo ngeJerusalema nabantu balo abahlubukako nabalotjha iinthombe.
ISAHLUKO SAMA-25 UKUYA KWESAMA-32
Ngo-609 B.C.E., mnyaka okwathoma ngawo ukuvinjezelwa kwamaswaphela kweJerusalema, livinjezelwa liBhabhiloni, umlayezo kaHezekiyeli wesahlulelo nje sele unqotjhiswe eentjhabeni ezimanaba, u-Amoni, u-Edomu, iGibhide, uMowabi, iFilista, iTsidoni neTirosi.
ISAHLUKO SAMA-33 UKUYA KWESAMA-48
Ukuthoma kwaka-606 B.C.E., iJerusalema nethempeli lakhona zimarubhi endaweni ekude, uHezekiyeli udzimelela emlayezweni wethemba wokubuyiselwa kokulotjha kwakaJehova uZimu okuhlwengileko.
Ngikho incwadi kaHezekiyeli ihleleke ngokulandelana kwezenzakalo nangokweenhloko. Iimphorofido ngokutjhatjalaliswa kweJerusalema nethempeli lalo zenzeka ngaphambi kweemphorofido ezinengi zokubuyiselwa kokulotjha okuhlwengileko. Lokhu kunengqondo ngombana iimphorofido zokubuyiselwa kokulotjha okuhlwengileko bezithi ukulotjha kwethempelini besele kujamile.
Ukungezelela kilokho, iimphorofido zakaHezekiyeli ngokujamelene neentjhaba ezimanaba ezibabhodileko (isahluko sama-25 ukufika kwesama-32) zifakwe hlangana nemilayezo ezizahlulelo ngeJerusalema neemphorofido ezimalungana nokubuyiselwa kokulotjha okuhlwengileko. Esinye isazi sakhuluma ngomlayezo kaHezekiyeli wesahlulelo malungana neentjhaba sathi: “Wakha ukutjhugulula kusuka elakeni lakazimu kufika emsenakhe awutjengisa abantu bakhe ngombana isijeziso samanababo siyingcenye yetjhaphuluko yabantu Bakhe.”
