PUSA E AʻOAʻO AI 1E
Se Aotelega o le Esekielu
E mafai ona vaevaeina le tusi o Esekielu i le auala o loo mulimuli mai:
MATAUPU 1 I LE 3
I le 613 T.L.M., a o nonofo faatasi Esekielu ma tagata Iutaia na ave faapagota i Papelonia, na ia vaaia ai ni faaaliga mai iā Ieova, ma na faatonuina o ia e vavalo i tagata Iutaia na nonofo i le vaitafe o Kepara.
MATAUPU 4 I LE 24
I le vā o le 613 ma le 609 T.L.M., na faia ai e Esekielu ni feʻau faavaloaga e patino lava i le faasalaga o Ierusalema ma ona tagata fouvale e ifo i tupua.
MATAUPU 25 I LE 32
O le 609 T.L.M., o le tausaga lea na amata ai le osofaʻiga mulimuli a Papelonia i Ierusalema, ma na suia ai le feʻau faafaamasinoga a Esekielu mai i Ierusalema agaʻi i nuu tuaoi na avea ma fili, o Amoni, Etoma, Aikupito, Moapi, Filisitia, Saitonu, ma Turo.
MATAUPU 33 I LE 48
I le 606 T.L.M., a o mamao ese mai i Ierusalema ma lona malumalu ua faatafunaina, na amata ai ona taulaʻi atu Esekielu i le feʻau o le faamoemoe, o le toe faafoʻisia lea o le tapuaʻiga mamā iā Ieova le Atua.
E faatulaga le tusi o Esekielu e tusa ma mea na tutupu ma le taimi na tutupu ai. Na muamua valoia le faaumatiaina o Ierusalema ma lona malumalu ona faatoʻā sosoo ai lea o le tele o valoaga e tusa ai ma le toe faafoʻisiaina o le tapuaʻiga mamā. E talafeagai lenā manatu, auā o valoaga e faatatau i le toe faafoʻisiaga e faailoa mai ai ua lē toe faia le tapuaʻiga i le malumalu.
E lē gata i lea, o valoaga a Esekielu e faatatau i nuu tuaoi na avea ma fili (mataupu 25 i le 32) o loo tovā ai feʻau faafaamasinoga faasaga iā Ierusalema ma valoaga e faatatau i le toe faafoʻisia o le tapuaʻiga mamā. Ua faapea mai se tasi o faitofā e faatatau i feʻau faafaamasinoga a Esekielu i nuu tuaoi: “E talafeagai le suia o le feʻau mai i le faalauiloaina o le toʻasā o le Atua i le faaalia o lona alofa mutimutivale i ona tagata, auā o le faasalaina o o latou fili, o se vaega o le laveaʻia o Ona tagata.”
