FAKI 1B
Den tori na ini a buku Esekièl
Wi kan prati a buku Esekièl na ini fo pisi:
KAPITEL 1 TE GO MITI 3
Na ini 613 Fosi Krestes, Esekièl kisi wan tu fisyun fu Yehovah di a ben libi na mindri den Dyu di ben de srafu na ini Babilon. A ben wroko leki profeiti tu èn a ben tyari den boskopu fu Yehovah gi den Dyu di ben libi na Kebar-liba.
KAPITEL 4 TE GO MITI 24
Na a pisi ten fu 613 te go miti 609 Fosi Krestes, Esekièl ben tyari a boskopu taki Yerusalem ben o kisi pori fu di den Dyu ben trangayesi Yehovah èn den ben anbegi falsi gado.
KAPITEL 25 TE GO MITI 32
A yari 609 Fosi Krestes ben de a lasti leisi di a legre fu Babilon lontu Yerusalem. Bigin nanga a yari dati, den boskopu fu Esekièl no ben de gi den sma na ini Yerusalem, ma gi den feanti fu den. Den boskopu disi ben de gi den kondre Amon, Edom, Egepte, Moab, Filistea, Sidon nanga Tirus.
KAPITEL 33 TE GO MITI 48
Na ini a yari 606 Fosi Krestes a foto Yerusalem nanga a tempel ben kisi pori kaba. Now Esekièl bigin tyari wan boskopu fu howpu. A ben taki dati Yehovah Gado ben o seti a tru anbegi baka.
Fa den tori na ini a buku Esekièl seti? Esekièl e taki fa sani pasa baka makandra. Boiti dati, Esekièl no e taki bruyabruya fu difrenti tori. A e taki fosi fu den profeititori di abi fu du nanga a pori fu Yerusalem nanga a tempel. Baka dati a e taki fu den profeititori di e sori fa Yehovah ben o seti a tru anbegi baka. Wi kan frustan taki a du disi, fu di den profeititori disi e taki fu a pisi ten di den Dyu no ben e anbegi Gado moro na a tempel.
Esekièl skrifi den profeititori di abi fu du nanga den feanti fu den Dyu (kapitel 25 te go miti 32), baka di a taki fu a pori fu Yerusalem èn fosi a taki fa a tru anbegi ben o seti baka. Wan sabiman e taki a sani disi fu den krutuboskopu di Esekièl ben abi gi den feanti fu den Dyu: „Esekièl e taki fu den krutuboskopu disi, baka te Gado strafu en pipel èn fosi a sori sari-ati gi den. Fu san ede a fiti taki a du dati? Fu di te Gado ben o strafu den feanti fu en pipel, dan den ben o kon fri.”
