LIBHOKISI LEKUFUNDZISA 1B
Loko Incwadzi YaHezekeli Lekhuluma Ngako
Incwadzi yaHezekeli yehlukaniswe ngalendlela lelandzelako:
SEHLUKO 1 KUYA KU-3
Nga-613 B.C.E., ngesikhatsi Hezekeli ahlala nemaJuda labetfunjwe eBhabhulona, ubona imibono levela kuJehova futsi umtfuma kutsi aphrofethe kumaJuda lahlala ngasemfuleni iKhebari.
SEHLUKO 4 KUYA KU-24
Emkhatsini wa-613 na-609 B.C.E., Hezekeli wetfula imilayeto lesiphrofetho ngalokuyinhloko lemayelana nekwehlulela iJerusalema nebantfu bayo labavukelako kanye nalabakhonta tithico.
SEHLUKO 25 KUYA KU-32
Kusukela nga-609 B.C.E., lokungumnyaka lapho iJerusalema ivinjetelwa libutfo laseBhabhulona kwekugcina, umlayeto wekwehlulela iJerusalema sewucondziswa etiveni letibomakhelwane, lokungema-Amoni, baka-Edomu, iGibhithe, bakaMowabi, iFilistiya, iSidoni neThire.
SEHLUKO 33 KUYA KU-48
Kusukela nga-606 B.C.E., njengobe iJerusalema nelithempeli layo kutindzala futsi kukhashane ngemakhilomitha langemakhulu, nyalo Hezekeli sewukhuluma ngemlayeto welitsemba, lokukubuyiselwa kwekukhonta lokuhlantekile kwaJehova Nkulunkulu.
Incwadzi yaHezekeli ihlelwe ngetihloko nangekulandzelana kwendlela tintfo letenteka ngayo. Tiphrofetho letimayelana nekubhujiswa kweJerusalema nelithempeli layo tita ngaphambi kwetiphrofetho letinyenti letimayelana nekubuyiselwa kwekukhonta lokuhlantekile. Loko kunengcondvo ngobe tiphrofetho letikhuluma ngekubuyiselwa kwekukhonta lokuhlantekile tikhombisa kutsi besekungasakhontwa ethempelini.
Ngetulu kwaloko, tiphrofetho taHezekeli lebetimelene netive letititsa lebetitungelete iJerusalema (sehluko 25 kuya ku-32) titfolakala emkhatsini wemilayeto lesehlulelo lemelene neJerusalema kanye netiphrofetho letimayelana nekubuyiselwa kwekukhonta lokuhlantekile. Lesinye sati nasikhuluma ngemilayeto yaHezekeli lesehlulelo leya etiveni satsi: “Loku kuyiveta kahle lendzaba kusukela esimemetelweni lesimayelana nentfukutselo yaNkulunkulu kuye endleleni labakhombisa ngayo umusa bantfu bakhe, ngobe kujeziswa kwetitsa tebantfu baJehova kuyincenye yekukhululwa kwebantfu bakhe.”
