REKUADRO 1B
Kʼusi chal li slivroal Esekiele
Xi chʼakbil li slivroal Esekiele:
KAPITULO 1 KʼALAL TA 3
Li ta sjabilal 613 kʼalal muʼyuk toʼox talem Jesuse, li Esekiele oy kʼusi akʼbat yil yuʼun Jeova kʼalal jmoj nakal xchiʼuk li judaetik ti chukbilik batel ta Babiloniae xchiʼuk albat ti chkʼot ta yaj-alkʼop judaetik ti te nakalik ta stsʼel ukʼum Kebare.
KAPITULO 4 KʼALAL TA 24
Li ta sjabilaltik 613 xchiʼuk 609 kʼalal muʼyuk toʼox talem Jesuse, li Esekiele laj yal albil kʼopetik xchiʼuk jutuk mu skotoluk jaʼ chal li kastigo chichʼ Jerusalene xchiʼuk li jnaklejetik ta skoj stoybailik xchiʼuk ta skoj ti chichʼik ta mukʼ santoetike.
KAPITULO 25 KʼALAL TA 32
Li ta sjabilal 609 kʼalal muʼyuk toʼox talem Jesuse, jaʼo sjoyobtaojik Jerusalen li jbabiloniaetike. Li Esekiele muʼyuk xa laj yal ti chichʼ kastigo li Jerusalene, yuʼun jaʼ lik yal ti chichʼik kastigo li lumetik ti chkontrainvanik ti te nopol oyik ta Israele: Ammon, Edom, Ejipto, Moab, Filistea, Sidon xchiʼuk Tiro.
KAPITULO 33 KʼALAL TA 48
Li ta sjabilal 606 kʼalal muʼyuk toʼox talem Jesuse, yichʼoj xa ox jinesel li Jerusalen xchiʼuk li templo ti nom xilik li Babiloniae. Li vaʼ kʼakʼale, li Esekiele jaʼ xa lik yal jun patob oʼontonal, yuʼun lik yal ti chchaʼta yav li melel yichʼel ta mukʼ Jeova Diose.
Li slivroal Esekiele lek xcholet chchap ta alel ti kʼu yelan kʼotanuk ta pasel xchiʼuk ta jujuvokʼ chal. Jaʼ baʼyel chal li albil kʼopetik sventa li sjinesel Jerusalen xchiʼuk li temploe, laj une jaʼ mas lik yalbe skʼoplal li albil kʼopetik ti chchaʼta yav li melel yichʼel ta mukʼ Diose. Sta-o tajek ti jech laj yichʼ alele, yuʼun jaʼ mas lek ta albel skʼoplal ti chchaʼta yav li melel yichʼel ta mukʼ Diose, yuʼun laj xa ox yichʼ alel ti chlaj li yichʼel ta mukʼ Dios ta temploe.
Jech xtok, li albil kʼopetik laj yal Esekiel ti chal ti chichʼik kastigo li lumetik ti tskontrainik li Israele (kapitulo 25 kʼalal ta 32) jaʼo laj yal kʼalal yaloj xa ox li albil kʼop ti chal ti chichʼ kastigo li Jerusalene, jaʼ xa slajeb laj yichʼ alel ti chchaʼta yav li melel yichʼel ta mukʼ Diose. Jun vinik ti lek chanunajeme, xi laj yal ta sventa li kastigo laj yal Esekiel ti tstaik li lumetik ti nopol xil Israele: «Li albil kʼopetik sventa li kastigo chichʼ li steklumal Diose jamal chakʼ ta ilel xtok ti oy xkʼuxul yoʼonton ta stojolal li steklumale, yuʼun kʼalal laj yal ti chichʼik kastigo li yajkontraike te smakojbe skʼoplal ti tspoj li steklumale».
