KAHON NGA NAGTUTUTDO 1B
Sumaryo han Ezekiel
Ha kabug-osan, an libro han Ezekiel mahimo bahin-bahinon ha masunod:
KAPITULO 1 TUBTOB 3
Han 613 B.C.E., samtang naukoy hi Ezekiel upod han mga Judio nga nadistyero ha Babilonya, nakakita hiya hin mga bisyon mahitungod kan Jehova ngan ginsugo nga managna ha mga Judio nga naukoy ha ligid han salog han Kebar.
KAPITULO 4 TUBTOB 24
Butnga han 613 ngan 609 B.C.E., hi Ezekiel nagpahayag hin mga tagna nga an kadak-an mahitungod han paghukom ha Jerusalem ngan ha rebelyoso ngan idolatroso nga mga umurukoy hito.
KAPITULO 25 TUBTOB 32
Tikang han 609 B.C.E., an tuig nga nagtikang an ultimo nga paglikos ha Jerusalem han mga taga-Babilonya, an kan Ezekiel mensahe han paghukom nabalhin tikang ha Jerusalem ngadto ha nakapalibot nga kaaway nga mga nasud—Ammon, Edom, Ehipto, Moab, Filistia, Sidon, ngan Tiro.
KAPITULO 33 TUBTOB 48
Tikang han 606 B.C.E., samtang guba pa an Jerusalem ngan an templo hito ginatos ka kilometro an kahirayo, nagpokus hi Ezekiel ha mensahe mahitungod han paglaom—an eksayting nga pagpahiuli han putli nga pagsingba kan Jehova nga Dios.
Ha kabug-osan, an libro han Ezekiel nakahan-ay uyon ha pagkasurunod han mga hitabo ngan uyon liwat ha topiko. An mga tagna parte ha kabungkagan han Jerusalem ngan han templo hito nauna ha kadam-an nga tagna mahitungod ha pagpahiuli han putli nga pagsingba. Lohikal ito kay an mga tagna mahitungod ha pagpahiuli nagpapasabot nga naundang na an pagsingba ha templo.
Dugang pa, an mga tagna ni Ezekiel kontra ha nakapalibot nga kaaway nga mga nasud (kapitulo 25 tubtob 32) mababasa butnga han iya mga mensahe han paghukom ha Jerusalem ngan han mga tagna mahitungod ha pagpahiuli han putli nga pagsingba. Mahitungod han mga mensahe ni Ezekiel han paghukom ha mga nasud, usa nga eskolar an nagsiring: “Angayan ini nga pagbalhin tikang ha pagpahayag han kapungot han Dios ngadto ha pagpahayag han Iya kalooy ha Iya katawohan, kay an pagsirot ha ira mga kaaway bahin mismo han katalwasan han Iya katawohan.”
