IBHOKISI YOKUFUNDISA 1B
Oko Kuthethwa Kwincwadi KaHezekile
Incwadi kaHezekile singayahlulahlula ngolu hlobo:
ISAHLUKO 1 UKUYA KU -3
Ngo-613 B.C.E., xa wayehlala nabantu abathinjiweyo eBhabhiloni, uHezekile ubona imibono kaYehova. Umthuma ukuba ayokuprofeta kumaYuda ahlala ngakumlambo iKebhare.
ISAHLUKO 4 UKUYA KU -24
Phakathi ko-613 no-609 B.C.E., uHezekile uprofeta ngokugwetywa kweYerusalem kunye nabantu bayo abangathobeliyo nabakhonza izithixo.
ISAHLUKO 25 UKUYA KU -32
Ukuqala ngo-609 B.C.E., unyaka amaBhabhiloni awaqala ngawo ukurhangqa iYerusalem okokugqibela, uHezekile uyayeka ukuthetha ngokugwetywa kweYerusalem. Aze athethe ngokugwetywa kweentlanga ezikufuphi nayo neziziintshaba zayo, ama-Amoni, amaEdom, amaYiputa, amaMowabhi, amaFilisti, amaSidon neTire.
ISAHLUKO 33 UKUYA KU -48
Ukuqala ngo-606 B.C.E., ngoxa iYerusalem netempile yayo yayingamabhodlo kude naye, uHezekile uthetha ngomyalezo onika ithemba, othi uYehova uza kuphinda akhonzwe ngendlela ayifunayo.
Incwadi kaHezekile ibhalwe ngokokulandelelana kwezinto ezenzekileyo nangokwemixholo. Kwaqala kwaprofetwa ngokutshatyalaliswa kweYerusalem netempile yayo ngaphambi kweziprofeto ezininzi ezithi uYehova uza kuphinda akhonzwe ngendlela ayifunayo. Ilindelekile loo nto, kuba bekungenakuthethwa ngokuphinda kukhonzwe uThixo kungakhange kuyekwe ukukhonzwa etempileni.
Ukongezelela, iziprofeto zikaHezekile ezithetha ngokugwetywa kweentlanga ezikufuphi (isahluko 25 ukuya ku- 32) zifakwe emva kwezo zithetha ngokugwetywa kweYerusalem naphambi kwezo zithi uYehova uza kuphinda akhonzwe ngendlela ayifunayo. Esinye isifundiswa sithi xa sithetha ngomyalezo kaHezekile oya kwiintlanga: “Kuyenza ilandelelane kakuhle le nto, ukusuka ekuxeleni umsindo kaThixo ukuya kwinceba yakhe ngabantu bakhe. Kuba kukodwa nje ukohlwaya iintshaba kudibene nokukhulula kukaThixo abantu bakhe.”
