Yɛ Biblia lɛ mli lɛ, Hebri feemɔwiemɔ ni atsɔɔ shishi akɛ “gbalɛ” lɛ ji na·vaʼʹ, ni nɔ titri ni etsɔɔ ji sane ko ni jɛ mumɔŋ, loo kojomɔ, loo jeŋba he tsɔɔmɔ, loo famɔ ko ni jɛ Nyɔŋmɔ ŋɔɔ ni ajajeɔ atsɔɔ. Ebaanyɛ etsɔɔ nɔ ko ni baaba ni Nyɔŋmɔ hãa ajajeɔ atsɔɔ hu. Gbɛi srɔtoi nɛɛ fɛɛ ni Nyɔŋmɔ tsɔɔ nɔ ejieɔ nibii akpo lɛ eko yɛ Ezekiel gbalɛi lɛ amli.​—Eze. 3:10, 11; 11:4-8; 14:6, 7; 37:9, 10; 38:1-4.

• NINAI

• NƆKWƐMƆNII

• NIFEEMƆI

Ninai, nɔkwɛmɔnii, abɛbuai, kɛ nifeemɔi ni ji gbalɛi yɛ Ezekiel wolo lɛ mli.

Ezekiel gbalɛi lɛ ekomɛi náa amɛmlibaa fe shi kome. Akɛ nɔkwɛmɔnɔ lɛ, gbalɛi ni kɔɔ anɔkwa jamɔ ni abaato shishi ekoŋŋ lɛ he lɛ ná emlibaa fioo be ni Nyɔŋmɔ webii lɛ ku amɛsɛɛ kɛtee Shiwoo Shikpɔŋ lɛ nɔ lɛ. Shi tamɔ bɔ ni atsɔɔ mli yɛ wolo nɛɛ Yitso 9 lɛ mli lɛ, nakai gbalɛi lɛ ateŋ babaoo miiba mli ŋmɛnɛ, ni yɛ wɔsɛɛ be ni kã wɔhiɛ lɛ mli hu lɛ, amɛbaaná amɛmlibaa ekoŋŋ.

Be ko ni eho lɛ, wɔsusu akɛ Ezekiel gbalɛi lɛ amli nibii pii feɔ nibii komɛi ni baaba wɔsɛɛ lɛ ahe mfoniri. Shi yɛ wolo nɛɛ mli lɛ, wɔsumɔŋ ni wɔtsɔɔ akɛ mɔ ko, loo nɔ ko, loo he ko, loo nifeemɔ ko ni yɔɔ Ezekiel gbalɛi lɛ amli lɛ feɔ mɔ ko, loo nɔ ko, loo he ko, loo nifeemɔ ko ni baaba yɛ ŋmɛnɛ beiaŋ lɛ he mfoniri, ja wɔyɛ Ŋmalɛ mli nɔ ko ni yɔɔ faŋŋ ni wɔbaadamɔ nɔ wɔfee nakai. * Moŋ lɛ, wolo nɛɛ baatsɔɔ bɔ ni gbalɛi babaoo ni yɔɔ Ezekiel wolo lɛ mli lɛ náa amɛmlibaa yɛ gbɛ ni da nɔ. Agbɛnɛ hu, ebaahã wɔna nibii ni wɔbaanyɛ wɔkase yɛ saji ni Ezekiel wie lɛ, gbɔmɛi ni ewie amɛhe, hei kɛ nifeemɔi ni etsĩtsĩi amɛtã lɛ amli.