Te weabe n Ebera ae na·vaʼʹ ae rairaki n te Baibara bwa “te taetae ni burabeti,” e kaineti riki ma taekinan ana rongorongo te Atua, te motikitaeka, te reirei i aon te aroaro ni maiu, ke te bae e tua te Atua. E kona naba n nanona taekinan ana taeka te Atua, ae taekan te bwai teuana ae e na bon roko. A bane n iai aeka ni kaotioti mairoun te Atua aikai, n ana taetae ni burabeti Etekiera.​—Etek. 3:​10, 11; 11:​4-8; 14:​6, 7; 37:​9, 10; 38:​1-4.

• MIITARA

• KABOTAU

• KAOTIOTINAKIN TE RONGORONGO

Iai n te boki ae Etekiera, taiani miitara, kabotau, kaikonaki, ao kaotiotinakin te taetae ni burabeti.

N tabetai ao taetae ni burabeti ake e taekin Etekiera, e riaon teuana te tai kakoroani bukia. N te katoto, a kakoroaki bukin taetae ni burabeti ake taekan te kakamaiu ngke a okira te Aba ni Berita ana aomata te Atua ngkoa. Ma e maroroakinaki ni Mwakoro 9 n te boki aei bwa a bati taetae ni burabeti ni kakamaiu aikai aika koro bukia naba n taai aikai, ao a na manga kakororaoaki naba n taai aika a na roko.

N taai aika nako ao iai baika ti nori ake kanoan ana taetae ni burabeti Etekiera, ake a tei ibukini bannan te bwai teuana ke banna ni kaikonaki. Ma n te boki aei ao e na aki taekinaki te aomata temanna, te bwai teuana, te tabo, ke te bwai ae riki, ae kanoan te taetae ni burabeti, bwa bannani baika riki n taai aikai, ma tii ngkana e bon oti n te Baibara bwa bon anne ae nanonaki iai. * Ma e na kaotaki iai kakoroani bukin ana taetae ni burabeti Etekiera aika bati, n te aro ae kakawaki riki. E na rinanoaki naba iai reireiara aika ti kona ni karekei man ana rongorongo Etekiera, ao mairouia naba aomata, taabo, ao baike a riki ake e taekin.