Sa Biblia, ang Hebreo nga berbo nga na·vaʼʹ, nga gin-translate “pagpanagna,” panguna nga nagapatuhoy sa pagpahayag sang mensahe, paghukom, panudlo parte sa moral, ukon sugo halin sa Dios. Nagapatuhoy man ini sa pagpahayag sa mga tagna sang Dios parte sa mga butang nga mahanabo. Ining tanan nga sahi sang tagna mabasa sa libro ni Ezequiel.—Ezeq. 3:10, 11; 11:4-8; 14:6, 7; 37:9, 10; 38:1-4.

• PALANAN-AWON

• ILUSTRASYON

• PAG-AKTO

Ang libro sang Ezequiel may mga palanan-awon, ilustrasyon, parabola, kag mga pag-akto sa mga tagna.

Kon kaisa, ang mga tagna ni Ezequiel indi lang isa ang katumanan. Halimbawa, ang mga tagna parte sa pagpasag-uli una nga natuman sang nagbalik ang katawhan sang Dios sa Ginsaad nga Duta. Pero binagbinagon sa kapitulo 9 sini nga libro nga ang kalabanan sini nga tagna nagakatuman sa aton panahon, kag may katumanan pa gid sa palaabuton.

Sang una, ang pila ka tagna ni Ezequiel ginapatihan nga may mga larawan kag may katumanan nga amo ang mga ginalarawan. Pero sa sini nga libro, ang ginsambit nga mga tawo, butang, lugar, ukon hitabo patuhuyan lamang nga may larawan ukon ginalarawan sa aton tion kon may basihan gid halin sa Kasulatan.^[a] Ang pokus sini nga libro amo ang daku pa nga katumanan sang madamo nga tagna ni Ezequiel. Binagbinagon man sini ang mga leksion nga matun-an naton sa mensahe ni Ezequiel, pati man sa mga tawo, lugar, kag mga hitabo nga ginsambit niya.