Na Biblia, ngogo ya Kiebreo na·vaʼʹ, yina bo me balula na “kubikula,” ke tadila ntete-ntete kuzabisa nsangu, lusambisu, dilongi ya bikalulu ya mbote, to nsiku ya me katuka na Nzambi yina yandi pesaka na nsadisa ya mpeve santu. Yo lenda tadila mpi kuzabisa nsangu ya Nzambi sambu na diambu mosi yina ta salama na bilumbu ke kwisa. Bambikudulu ya Ezekiele kele ti bansangu yai yonso ya me katuka na Nzambi.—Ezek. 3:10, 11; 11:4-8; 14:6, 7; 37:9, 10; 38:1-4.

• BAMBONA-MESO

• BAMBANDU

• BANSONGA

Mukanda ya Ezekiele kele ti bambona-meso, bambandu, bingana mpi bansonga ya ke monisa mutindu bambikudulu ta lungana.

Bambikudulu ya nkaka yina Ezekiele tubilaka ke lungana na mitindu mingi. Mu mbandu, bambikudulu ya ke tubila mutindu Nzambi vutulaka lusambu ya bunkete, lunganaka mwa fioti ntangu bansadi ya Nzambi vutukaka na Ntoto ya Lusilu. Kansi mutindu beto ta mona yo na Kapu 9 ya mukanda yai, mingi na kati ya bambikudulu yai ya ke tubila mutindu Nzambi vutulaka lusambu ya bunkete ke lungana bubu yai mpi yo ta lungana diaka na bilumbu ke kwisa.

Na ntangu ya ntama, beto vandaka kumona mambu mingi ya bambikudulu ya Ezekiele bonso bizuzi ya mambu yina zolaka kusalama na bilumbu ke kwisa. Kansi mukanda yai ke tubila ve konso muntu, kima, kisika to diambu bonso bizuzi ya ke monisa mambu ya ke lungana bubu yai; yo ke tubila yo kaka kana kele ti verse mosi ya pwelele ya ke pusa beto na kusala mutindu yai. * Ata mpidina, yo ta tubila kulungana ya nene ya bambikudulu mingi ya Ezekiele. Diaka, beto ta tubila malongi yina beto lenda baka na nsangu ya Ezekiele mpi na bantu, bisika mpi mambu yina yandi tubilaka.