Mu Baibolo kyambo kya Kihebelu kya na·vaʼʹ, kyatuntululwa’mba “bungauzhi,” kilumbulula byambo bya Lesa bya bunchibamambo, mafunde ne mikambizho ya Lesa. Kabiji kilumbulula ne byambo bya Lesa byaambila jimo bikamweka kulutwe. Abino byonse bitanwa mu bungauzhi bwaawile Ezikyo.—Ezi. 3:10, 11; 11:4-8; 14:6, 7; 37:9, 10; 38:1-4.

• BIMWESHO

• BISHIMPI

• BIFWANYIKIZHO

Mu buku wa Ezikyo muji bimwesho, bishimpi ne bifwanyikizho.

Bungauzhi bwaambile Ezikyo bufika mu mbaji yavula. Nabiji bungauzhi bwaambilenga pa kubwezha bupopweshi bwa kine bwafikileko pacheche kimye bantu ba Lesa byo babwelelenga ku Ntanda ya Mulaye. Byonka byo tukafunda mu Kitango 9 kya uno buku, bungauzhi bwaambilenga pa kubwezha bupopweshi bwa kine bubena kufika lelo jino kabiji bukafika ne mu kimye kya kulutwe.

Mu myaka ya kunyuma kwe, twaambilepo pa bungauzhi bumo bwanembwa mu buku wa Ezikyo kuba’mba bwimenako bintu bimo. Mu uno buku kechi twaambapo pa muntu, bintu nangwa mpunzha kuba’mba bibena kwimenako kintu kimo kikamweka mu ano moba ne. Twakonshatu kuba bino inge twataana bishinka bya mu Binembelo byaamba bino. * Bino uno buku, waamba pa kufika kwa bungauzhi bwanembwa mu buku wa Ezikyo. Kabiji walumbulula ne byo twakonsha kufunjilako ku biji mu buku wa Ezikyo, nabiji bantu, mapunzha ne byamwekelenga.