EBhayibhilini ibala lesiHebheru elithi na·vaʼʹ, elihunyutshwa ngokuthi “phrofetha,” litsho ukukhuluma amazwi avela kuNkulunkulu, kungaba yisahlulelo, umlayo loba imfundiso. Lingatsho lokukhuluma into uNkulunkulu athi izakwenzakala esikhathini esizayo. Iziphrofetho zikaHezekheli zilakho konke lokhu.—Hez. 3:10, 11; 11:4-8; 14:6, 7; 37:9, 10; 38:1-4.

• IMIBONO

• IMIZEKELISO

• AYEKWENZA PHAMBI KWABANTU

Ibhuku likaHezekheli lilemibono lemizekeliso. Kwezinye izikhathi kulezinto ayezenza phambi kwabantu ukuze bazwisise lokho uNkulunkulu ayebatshela khona.

Ezinye iziphrofetho ezabhalwa nguHezekheli zagcwaliseka ngesikhathi sama-Israyeli futhi zizaphinda zigcwaliseke esikhathini esizayo. Ngokwesibonelo okunye okwaphrofethwa nguHezekheli mayelana lokuvuselelwa kokukhonza kweqiniso kwagcwaliseka ngesikhathi abantu bakaNkulunkulu bebuyela eLizweni Lesithembiso. Kodwa okunengi kwakhona kuyagcwaliseka lamuhla futhi kuzaphinda kugcwaliseke esikhathini esizayo. Lokhu sizakufunda eSahlukweni 9 sebhuku leli.

Indlela esesichasisa ngayo iziphrofetho zikaHezekheli isitshiyene lendlela esasizichasisa ngayo kudala. Kudala sasijayele ukulandelela yonke into eseziphrofethweni lezo sizama ukutsho ukuthi imelani. Kodwa ebhukwini leli lokhu akwenziwa ngaphandle nxa iMibhalo iveza ukuthi umuntu, into, indawo loba isenzakalo okukhulunywa ngaso simelani. a Inhloso yebhuku leli yikuveza ukuthi iziphrofetho zikaHezekheli zigcwaliseka njani. Limumethe lezifundo esizithola eziphrofethweni zikaHezekheli. Sizabona lokuthi kuyini esikufunda ebantwini akhuluma ngabo lasendaweni aziqambayo kanye lasezintweni ezazisenzakala ngalesosikhathi.