EBhayibhelini isenzo sesiHebheru esithi na·vaʼʹ, esitjhugululwe ngokuthi “isiphorofido” singatjho umlayezo ophefumulelweko, isahlulelo, ifundiso yokuziphatha namkha umlayezo ovela kuZimu. Ingabuye itjho godu isimemezelo esivela kuZimu sokuthileko okuzako. Iimphorofido zoke zakaHezekiyeli zihlanganisa yoke imihlobo yokwambulwa kwezulwini.—Hez. 3:10, 11; 11:4-8; 14:6, 7; 37:9, 10; 38:1-4.

• IMIBONO

• IMIFANEKISO

• IMIFANEKISO EYENZIWA NGOKUNQOPHILEKO

Incwadi kaHezekiyeli inemibono, imifanekiso, imiboniso nemifanekiso eyenziwa ngokunqophileko.

Iimphorofido zakaHezekiyeli ngasikhathi zizaliseka ngeendlela ezinengi. Ngokwesibonelo, iimphorofido malungana nokubuyiselwa kokulotjha okuhlwengileko zibe nokuzaliseka okuncani ngesikhathi abantu bakaZimu babuyela eNarheni yesiThembiso. Kodwana njengombana kuveziwe esaHlukweni 9 sencwadi le, iimphorofido ezinengi ngokubuyiselwa kokulotjha okuhlwengileko zizaliseka namhlanjesi begodu zizokuzaliseka ngengomuso.

Esikhathini esidlulileko, besiqala iimphorofido ezithileko zakaHezekiyeli njengesisekelo sezenzakalo ezenzekileko namkha ezifanekisela okhunye okwenzekileko. Nanyana kunjalo, incwadi le iyakubalekela ukuhlathulula umuntu, into, indawo namkha isehlakalo esithileko njengesisiphorofido esinokuzaliseka kwanamhlanjesi ngaphandle kokobana kube nomtlolo otjho njalo. a Kunalokho izokuqalisela ekuzalisekeni okukhulu kweemphorofido zakaHezekiyeli ezinengi. Izokukhuluma godu ngeemfundo esingazifunda emlayezweni kaHezekiyeli, ngabantu, iindawo nezenzakalo ezikhulunywa nguye.