Kitaaba Qulqulluu keessatti jechi Afaan Ibrootaa naavaa jedhuu fi “raajii dubbachuu” jedhamee hiikame, adda durummaadhaan ergaa, murtii, barumsa naamusaa ykn ajaja Waaqayyo biraa dhufe labsuu kan argisiisu dha. Jechi kun wanta gara fuulduraatti dhufu ilaalchisee wanta Waaqayyo dubbate labsuus kan argisiisu taʼuu dandaʼa. Raajiiwwan Hisqiʼel mulʼatawwan Waaqayyo biraa dhufan kana hundumaa kan dabalatu dha.—His. 3:10, 11; 11:4-8; 14:6, 7; 37:9, 10; 38:1-4.

• MULʼATA

• FAKKEENYA

• HOJIIN ARGISIISA

Kitaabni Hisqiʼel mulʼatawwan, fakkeenyotaa fi hojiin argisiisawwan ergaa raajii dabarsan qabateera.

Raajiiwwan Hisqiʼel dubbate yeroo tokko tokko raawwii tokkoo ol qabu. Fakkeenyaaf, yeroo sabni Waaqayyoo gara Biyyattii Abdachiifamteetti deebiʼanitti raajiiwwan waaqeffannaa qulqulluun deebiʼee akka hundeeffamu dubbataman hamma tokko raawwii isaanii argataniiru. Taʼus akkuma Boqonnaa 9⁠ffaa kitaaba kanaa keessatti ibsame, raajiiwwan waaqeffannaa qulqulluun deebiʼee akka hundeeffamu ibsan hedduun yeroo ammaatti raawwatamaa jiru, gara fuulduraattis ni raawwatamu.

Kanaan dura wantoonni raajiiwwan Hisqiʼel keessatti ibsaman hedduun wantoota dhugaa taʼanii fi gaaddidduu taʼan akka argisiisanitti yaanna turre. Haa taʼu malee, akkas jechuuf Kitaaba Qulqulluu keessatti ragaan ifa taʼe hamma hin jirretti kitaabni kun namni, wanti, iddoon ykn taʼeen kam iyyuu raajii bara keenyatti raawwatamu tokkoof gaaddidduu akka taʼe hin ibsu. * Kanaa mannaa kitaabichi raawwii guguddaa raajiiwwan Hisqiʼel keessatti dubbataman hedduu irratti xiyyeeffata. Kana malees ergaa Hisqiʼel irraa, akkasumas namoota, iddoowwanii fi taʼeewwan inni caqase irraa barumsawwan argachuu dandeenyu ibsa.