Na yâ ti Bible, tënë ti Hébreu na·vaʼʹ, so a kiri peko ni na tënë “prophétie,” aye kozoni kue ti sara tënë ti fango mbeni tënë so a tene ni na gbe ti yingo ti Nzapa, mbeni tënë ti ngbanga, mbeni fango ye na ndö ti nzoni sarango ye wala mbeni commandement so alondo na Nzapa. A lingbi nga ti sara tënë ti sarango tënë ti mbeni tënë so Nzapa afa na ndö ti mbeni ye so ayeke si na yâ ti angoi so ayeke ga. Aprophétie ti Ézéchiel andu atënë ni so kue.—Ézéch. 3:10, 11; 11:4-8; 14:6, 7; 37:9, 10; 38:1-4.

• AVISION

• ATOLI

• AYE SO LO SARA

Na yâ ti mbeti ti Ézéchiel, mo yeke wara avision, atoli, aparabole nga na aye so Nzapa atene na lo ti sara na lê ti azo ti fa na ala aye so ayeke si.

Ambeni prophétie so Ézéchiel atene aga tâ tënë gï fani oko ape. Na tapande, aprophétie so asara tënë ti kiringo ti aye tongana ti kozo aga tâ tënë lani na ngoi so azo ti Nzapa akiri na Sese ti Zendo. Me tongana ti so chapitre 9 ti mbeti so afa, mingi ti aprophétie so asara tënë ti kiringo ti aye tongana ti kozo aga tâ tënë na ngoi ti e na ayeke kiri ti ga tâ tënë na yâ ti angoi so ayeke ga.

Ândö, e tene so ambeni ye na yâ ti prophétie ti Ézéchiel ayeke fä ti mbeni zo, ti mbeni ye, ti mbeni ndo wala ti mbeni ye so asi laso. Me na yâ ti mbeti so, e yeke tene ni gï tongana Bible afa polele so a yeke tongaso. * Mbeti so ayeke fa tongana nyen la aprophétie ti Ézéchiel mingi aga tâ tënë. A yeke fa nga aye so e lingbi ti manda na lege ti atënë ti Ézéchiel, azo so lo sara tënë ti ala, ando so lo sara tënë ni nga na aye so lo sara tënë ni.