Ao amin’ny Baiboly, ilay matoanteny hebreo hoe navaʼ, izay nadika hoe “maminany”, dia midika hoe mampita hafatra, na didim-pitsarana, na fampianarana, na didy avy amin’Andriamanitra. Mety hidika koa izy io hoe milaza hafatra momba ny hoavy avy amin’Andriamanitra. Hita ao amin’ny faminanian’i Ezekiela daholo ireo karazana hafatra ireo.​—Ezek. 3:10, 11; 11:4-8; 14:6, 7; 37:9, 10; 38:1-4.

• FAHITANA

• FANOHARANA

• KARAZANA FAMPISEHOANA

Nampitaina tamin’ny alalan’ny fahitana sy fanoharana ary karazana fampisehoana ny faminaniana ao amin’ny bokin’i Ezekiela.

Indraindray tsy indray mandeha fotsiny no tanteraka ny faminanian’i Ezekiela. Hoatr’izany izao ny faminaniana momba ny famerenana amin’ny laoniny ny fivavahana madio. Efa tanteraka ny ampahany tamin’izy io rehefa niverina tany amin’ny Tany Nampanantenaina ny vahoakan’Andriamanitra. Maro amin’ireo faminaniana ireo koa anefa no tanteraka amin’izao ary mbola ho tanteraka amin’ny hoavy, araka ny ho hitantsika ao amin’ny Toko faha-9.

Nieritreritra isika taloha hoe tandindon’ny hoavy ny zavatra sasany resahin’ny faminanian’i Ezekiela, izany hoe mifanitsy amina zavatra mbola ho avy ny olona na zavatra na toerana na zava-nitranga sasany resahina ao. Tsy misy resaka tandindona ato amin’ity boky ity, raha tsy hoe misy porofo mazava momba an’izany ao amin’ny Baiboly. a Horesahina ato kosa ny fahatanterahan’ny maro amin’ny faminanian’i Ezekiela, amin’izao sy amin’ny hoavy. Hodinihina ato koa ny lesona azontsika raisina avy amin’ny hafatra nampitain’i Ezekiela, sy avy amin’ny olona sy ny toerana ary ny zava-nitranga noresahiny.