Na ini Bijbel, a Hebrew wortu nava di vertaal nanga „profeititori” wani taki dati wan sma e fruteri wan boskopu fu Gado, wan krutuboskopu noso wan komando fu Gado. A abi fu du tu nanga a fasi fa Gado wani taki sma musu tyari densrefi. Son leisi a kan abi fu du nanga wan boskopu fu Gado di e sori san o pasa. Den profeititori fu Esekièl ben abi fu du nanga ala den sani disi.​—Esek. 3:10, 11; 11:4-8; 14:6, 7; 37:9, 10; 38:1-4.

• FISYUN

• AGERSITORI

• SANI DI A BEN MUSU DU

A buku Esekièl abi fisyun nanga agersitori. Boiti dati, Yehovah ben meki Esekièl du sani fu sori san ben o pasa.

Sonwan fu den profeititori di Esekièl skrifi e kon tru moro leki wán leisi. Fu eksempre, den profeititori di e sori taki Yehovah ben o seti a tru anbegi baka ben kon tru di a pipel fu Gado drai go baka na a Pramisi Kondre. Ma kapitel 9 fu a buku disi e sori taki den profeititori disi e kon tru na ini a ten disi tu èn den o kon tru na ini a ten di e kon.

Na ini a ten di pasa wi ben taki dati son tori na ini a Bijbel buku Esekièl e prenki moro bigi sani di ben o pasa bakaten. Ma na ini a buku disi wi no e taki dati ibri sma, ibri sani, ibri presi, noso ibri sani di pasa e prenki wan moro bigi sani. Wi e du dati soso te Bijbel srefi e sori krin taki dati de so. a A buku disi e sori fa den profeititori fu Esekièl o kon tru na ini a ten di e kon. Wi o si tu san wi kan leri fu den boskopu fu Esekièl, fu den sma nanga den presi na ini a ten fu en èn fu den sani di ben pasa.