EBhayibhelini sento sesiHebheru letsi na·vaʼʹ, lokusho “siphrofetho,” ngalokuyinhloko sibhekisela emlayetweni lophefumulelwe, esehlulelweni, emfundzisweni lemayelana nekutiphatsa nobe emyalweni lovela kuNkulunkulu. Singaphindze sibhekisele emlayetweni lovela ezulwini lomayelana nentfo letsite letako. Tiphrofetho taHezekeli tifaka ekhatsi tonkhe letinhlobo tetembulo letivela kuNkulunkulu.—Hez. 3:10, 11; 11:4-8; 14:6, 7; 37:9, 10; 38:1-4.

• IMIBONO

• IMIFANEKISO

• IMIBONISO

Incwadzi yaHezekeli icuketse imibono, imifanekiso nemiboniso yemilayeto letiphrofetho.

Ngaletinye tikhatsi, tiphrofetho letashiwo nguHezekeli tagcwaliseka ngetindlela letingetulu kwayinye. Nasi sibonelo, tiphrofetho letimayelana nekubuyiselwa tagcwaliseka kanye ngesikhatsi bantfu baNkulunkulu babuyela Eveni Lesetsembiso. Kodvwa njengobe kuchaziwe esehlukweni 9 salencwadzi, tiphrofetho letinyenti tekubuyiselwa tiyagcwaliseka lamuhla futsi titawuphindze tigcwaliseke nasesikhatsini lesitako.

Esikhatsini lesendlulile sike sabuka tincenye letinyenti tetiphrofetho taHezekeli, njengendzaba lengumfanekiso naloko lekumelelako. Nobe kunjalo, lencwadzi ayichazi ngebantfu, tintfo, indzawo nobe tentakalo, njengendzaba lengumfanekiso waloko lokutawenteka esikhatsini salamuhla ngaphandle nangabe kunesizatfu lesicacile lesisemiBhalweni sekwenta kanjalo. * Kunaloko, lencwadzi itawuchaza mayelana nekugcwaliseka ngelizinga lelisetulu kwetiphrofetho taHezekeli. Itawuphindze ihlolisise tifundvo lesingatifundza emlayetweni waHezekeli, kuhlanganise nakubantfu, indzawo kanye netintfo letentekako lakhuluma ngato.