Lo Bible, vɛrbɛ na·vaʼʹ ya lo Hɛbɛru yakakadimɔma ɔnɛ “prɔfɛsiya,” mɛnyaka ntondotondo wewoyelo wa losango lakasambiyama, dilanya, wetshelo wendana la lɔkɛwɔ kana didjango di’oma le Nzambi. Yɔ koka nto mendana la diewoyelo di’oma le Nzambi dia dui dimɔtshi diayosalema. Prɔfɛsiya ya Ɛzɛkiyɛlɛ mendanaka la weho ɛsɔ tshɛ wa weshwelo w’oma le Nzambi.​—Ɛzk. 3:10, 11; 11:4-8; 14:6, 7; 37:9, 10; 38:1-4.

• WAƐNƐLƆ

• BƐNYƐLƆ

• TƆKƐNYƆ

Dibuku dia Ɛzɛkiyɛlɛ diekɔ la waɛnɛlɔ, bɛnyɛlɔ, wɛɛla ndo tɔkɛnyɔ ta losango la prɔfɛsiya.

Tena dimɔtshi prɔfɛsiya ya Ɛzɛkiyɛlɛ mongaka l’ekotshamelo efula. Ɛnyɛlɔ, prɔfɛsiya y’okaloyelo yakakotshama lo yɛdikɔ mɔtshi etena kakakalola ekambi wa Nzambi lo Nkɛtɛ ya Daka. Koko oko wɛnyamidiɔ lo tshapita ya 9 ya dibuku nɛ, efula ka prɔfɛsiya shɔ y’okaloyelo yekɔ lo kotshama ɛlɔ kɛnɛ ndo yayokotshama nto lo nshi yayaye.

Lo nshi yakete, takɔsaka awui efula wa lo prɔfɛsiya ya Ɛzɛkiyɛlɛ oko ehikamelo ka didjidji ka dui dimɔtshi ndo okotshamelo adiɔ. Koko lo dibuku nɛ, hatɔtɛkɛta dikambo dia onto, ɛngɔ, dihole kana dia dui dimɔtshi oko didjidji dia prɔfɛsiya diele l’okotshamelo adiɔ nshi nyɛ, onyake paka naka tekɔ l’ɔkɔkɔ ɔmɔtshi wokɛma hwe w’oma l’Afundelo mbakokaso nsala dui sɔ. * Koko dibuku nɛ diayɛnya okotshamelo wa woke efula wa prɔfɛsiya efula ya Ɛzɛkiyɛlɛ. Tayɔsɛdingola nto lɔkɔ wetshelo wakokaso nkondja oma lo losango la Ɛzɛkiyɛlɛ kaamɛ ndo oma le anto, ahole ndo oma l’awui wakandatɛkɛta.