Mu Bbaibbele, ibbala lya Chihebrayo lyakuti na·vaʼʹ, ilyaamba “kusinsima,” kanji-kanji lyaamba kwaambilizya mulumbe iwakasololelwa, lubeta, njiisyo zyakulilemeka, naa mulawo uuzwa kuli Leza. Alimwi lilakonzya kwaamba kwaambilizya mulumbe wa Leza kujatikizya cintu iciyoocitika kumbele. Businsimi bwa Ezekieli bulabikkilizya misyobo eeyo yoonse yamilumbe ya Leza.—Ezk. 3:10, 11; 11:4-8; 14:6, 7; 37:9, 10; 38:1-4.

• ZILENGAANO

• ZIKOZYANYO

• ZITONDEZYO

Bbuku lya Ezekieli lijisi zilengaano, zikozyanyo, alimwi azitondezyo zyamilumbe yabusinsimi.

Businsimi ibwakaambwa a Ezekieli zimwi ziindi bulazuzikizyigwa kutali buyo ciindi comwe. Mucikozyanyo, businsimi bwakubukulusyigwa bwakazuzikizyigwa buyo ciindi bantu ba Leza nobakapiluka ku Nyika Yakasyomezyedwe. Pele mbubwenya mbocitondezya Cibalo 9 cabbuku eeli, businsimi bunji bwakubukulusyigwa bulazuzikizyigwa mazuba aano alimwi buciyoozuzikizyigwa kumbele.

Kaindi, twakali kubona zibeela zili mbozibede zyabusinsimi bwa Ezekieli kuti kuzuzikizyigwa kwanzizyo kuli ncoziiminina. Nokuba boobo, bbuku eeli talyaambi muntu uuli woonse, cintu, busena naa cintu cimwi cakacitika kuti ciiminina businsimi bumwi bwalo ibuzuzikizyigwa mazuba aano ccita kuti Magwalo aamba cacigaminina ndendilyo notukonzya kucita boobo. * Muciindi caboobo, linakwaamba kuzuzikizyigwa kupati kwabusinsimi bunji ibwa Ezekieli. Alimwi linoolanga-langa ziiyo nzyotukonzya kwiiya kumulumbe wa Ezekieli, kubikkilizya abantu, masena, alimwi azintu zyakacitika izyaambidwe anguwe.