Le tʼaan navá ich hebreo ku chíikpajal teʼ Bibliaoʼ ku traducirtaʼal «profetizar». Lelaʼ u kʼáat u yaʼaleʼ u tsʼaʼabal ojéeltbil junpʼéel baʼax kun úuchul, u yaʼalaʼal yaan u tsʼaʼabal junpʼéel castigo, u yaʼalaʼal bix unaj u kuxtal máak wa u yaʼalaʼal baʼax u kʼáat Dios ka beetaʼak. Tuláakal le baʼaloʼobaʼ ku chíikpajal tiʼ le profecíaʼob tu tsʼíibtaj Ezequieloʼ (Eze. 3:10, 11; 11:4-8; 14:6, 7; 37:9, 10; 38:1-4).

• TSʼAʼAB ILBIL

• KEʼETI

• EʼESAʼABI

Yaan kʼiineʼ Dioseʼ tu tsʼáaj ilbil profecíaʼob, tu ketaj wa tu yaʼalaj tiʼ u profeta ka u beet wa baʼax utiaʼal u yeʼesik baʼax kun úuchul.

Yaan tiʼ le profecíaʼob tu yaʼalaj Ezequieloʼ jejeláas bix úuchik u béeytaloʼob. Jeʼex le profecíaʼob ku tʼaanoʼob tiʼ bix kun kaʼa adorarbil Jéeoba jeʼex unajeʼ yáaxeʼ béeychajoʼob le ka suunaj u kaajal Dios teʼ luʼum aʼalaʼan u tsʼaʼabaltiʼoboʼ. Chéen baʼaleʼ jeʼex u yeʼesik le xook 9 yaan teʼ libroaʼ táan u béeytaloʼob teʼ kʼiinoʼobaʼ yéetel yaan xan u kaʼa béeytaloʼob.

Kaʼacheʼ ichil u profecíaʼob Ezequieleʼ ku kaxtaʼal baʼax u kʼáat u yaʼal cada junpʼéel tiʼ le baʼaxoʼob ku chʼaʼchiʼitaʼaloʼ. Chéen baʼaleʼ wa le Biblia maʼ tu yaʼalik baʼax u kʼáat u yaʼal wa baʼaxoʼ ichil le libroaʼ maʼ tun tsolbil baʼax u kʼáat u yaʼal cada máax ku chʼaʼchiʼitaʼaliʼ, cada baʼal ku yaʼalaʼaliʼ wa cada lugar ku chíikpajliʼ. * Chéen ku tsolik bix u béeytal le profecíaʼob tu yaʼalaj Ezequieloʼ. Ku tsolik xan baʼaxoʼob jeʼel k-kanik tiʼ le profecíaʼob tu yaʼaloʼ, tiʼ le máaxoʼob tu chʼaʼchiʼitoʼ, tiʼ le lugaroʼoboʼ bey xan tiʼ le baʼaxoʼob tu yaʼalaj kun úuchloʼ.