Seguradong si Ezequiel nakakita nag dagkong estatuwa sa mga torong baka nga may pako ug sa mga leyon nga may ulo sa tawo, nga nagtindog ingong mga bantay atubangan sa mga palasyo ug templo. Kana nga mga estatuwa makita sa tibuok Asirya ug Babilonia sa karaang panahon. Sama sa ubang nagtan-aw, lagmit nahingangha siya sa kadagko niini, nga ang uban may gihabogong mga sayis metros. Apan bisag unsa pa kini ka gamhanan tan-awon, kini walay kinabuhi, nga kinulit lang sa bato.

Sa kasukwahi, ang upat ka linalang nga nakita ni Ezequiel sa panan-awon maoy “buhing mga linalang.” Pagkadakong kalainan! Dako kaayo kinig epekto kang Ezequiel nga tungod niana iyang gihisgotan ang terminong “buhing mga linalang” 11 ka beses sa introduksiyon sa iyang tagna. (Ezeq. 1:5-22) Tungod sa panan-awon bahin sa upat ka buhing linalang nga dungan nga nagpaingon sa samang direksiyon ubos sa trono sa Diyos, lagmit nasabtan pag-ayo ni Ezequiel nga bug-os kontrolado ni Jehova ang tanang linalang. Pinaagi sab niana nga panan-awon, bug-os natong nasabtan karon ang kabantog ug gahom ni Jehova ug ang kahalangdon sa iyang pagkasoberano.​—1 Cron. 29:11.