Sigurado a nakakitan ni Ezekiel iti nagdadakkel nga estatua dagiti nagpayak a kalakian a baka ken leon a tao ti uloda a nakatakder kas guardia iti sango dagiti palasio ken templo. Adda dagita nga estatua iti nadumaduma a paset ti nagkauna nga Asiria ken Babilonia. Kas iti amin a nakakitan kadagita, nasdaaw met a nangmingming kadagita a nakabutbuteng a parsua, a ti dadduma ket dandani 6 a metro ti kangatoda. Kasla nakabilbileg dagitoy a parsua ngem awan ti biagda ta naaramid laeng dagita iti bato.

Ngem ti uppat a parsua a nakita ni Ezekiel iti sirmata ket “sibibiag a parsua.” Talaga a naidumada! Dakkel ti epekto ken Ezekiel dayta a nakitana ta uray la namin-11 nga inusarna ti sasao a “sibibiag a parsua” iti pangrugian ti padtona. (Ezek. 1:5-22) Ti sirmata maipapan iti uppat a sibibiag a parsua nga aggigiddan ti panaggarawda iti baba ti trono ti Dios ti nangimula iti isip ni Ezekiel a ni Jehova ti mangiturturong iti amin a parsuana. Ita, dayta met laeng a sirmata ti mangipaganetget kadatayo iti kinatan-ok ken pannakabalin ni Jehova ken iti kinadayag ti panangiturayna.​—1 Cron. 29:11.