Ezikyo wafwainwa wamonanga bañombe baji na byapi ne ba bokwe baji na mitwe ya bantu saka baimana nobe bakasopa pa bibelo bya bipango ne mu mazubo a balesa. Bino byo babumba byatanwanga mu Asilya ne mu Babilonya kala. Byonka byakumyanga bantu bonse, ne Ezikyo naye wakumyanga bingi pa kumona bino byo babumba bimo byalepele kufika ku mamita 6 kuya mwiulu. Bino nangwa kya kuba bino byo babumba byamwekanga nobe biji na bulume, kechi byajinga byumi ne, mambo bebisongeletu kufuma ku mabwe.

Kupusanako na bilengwa bina byamwene Ezikyo mu kimwesho, abyo byajinga “bilengwa byumi.” Luno lupusano lwabayile bingi. Kino kimwesho kyamwene Ezikyo, kyamufikile bingi pa muchima, kabiji kyo kyalengejile ne kunemba byambo bya kuba’mba “bilengwa byumi” bimye 10 mu byambo bitanshi mu buku wa bungauzhi ye anembele. (Ezi. 1:5-22) Kimwesho kyo amwene mwajinga bilengwa byumi bina byayilenga kuntu kumo pa kimye kimotu munshi ya jitanda ja Lesa. Kino kyamulengejile kushiinwa’mba Yehoba uji na bulume pa bilengwa byonse. Lelo jino, kino kimwesho kitulengela kukumya pa bukata ne bulume bwa Yehoba nkambo walengele bintu byonse.—1 Moba 29:11.