Bidi bimueneka ne: Yehezekele ukavua mumone bimfuanyi binene bia ngombe milume ne ntambue bivua ne mapuapua bikale ne mitu ya bantu bizola anyi bimanyika kumpala kua nzubu ya bakalenge ne kua ntempelo bua kuyilama. Bimfuanyi bia nanku bivua bitule bipuwe mu Ashû wa kale ne mu Babilona mujima. Anu bu bantu bakuabu, Yehezekele uvua pende ne bua kuikala ukema bikole pavuaye ubibandila bualu bimue bia kudibi bivua bule butue ku metre 6. Kadi nansha muvua bimfuanyi abi bimueneka bia bukole, kabivua ne muoyo to, bualu bivua bienza ne mabue.

Kadi bifukibua binayi bivua Yehezekele mumone mu tshikena kumona atshi bivua bishilangane bikole ne bivuaye umona bualu biobi ‘bivua ne muoyo.’ Bualu abu buvua bumulenge bikole, yeye kufika ku difunda tshiambilu tshia ne: “bifukibua bidi ne muoyo” misangu 11 mu mêyi ende a buprofete a ntuadijilu. (Yeh. 1:5-22) Tshikena kumona tshia bifukibua binayi bidi ne muoyo bivua biya bionso tshiapamue luseke lumue bikale muinshi mua nkuasa wa bukalenge wa Nzambi, tshivua ne bua kuikala tshikemeshe Yehezekele bua mudi Yehowa ulombola bifukibua biende bionso. Lelu, tshikena kumona atshi tshidi kabidi tshitukemesha bua bunene ne bukole bua Yehowa ne bunene bua bumfumu buende.​—1 Kul. 29:11.