Ezekele amwene vangombe vakutenga vaze vapwile namavava, navandumba vaze vapwile namitwe yakufwana nge yavatu vanemana kulutwe lwanganda natembele kwijiva nge vaka-kulama. Tunyama kanava vakutenga vapwilenga muAsulya yakushikulu namuMbavilone. Ngana mwavatu vosena, Ezekele naikiye atela alikomokelele hakutala ava tunyama vakutenga vaze vapwile vavasuku jimita kafwe 6. Numba tuhu vaze tunyama vasolokelenga kupwa vangolo, oloze vapwile kaha vamalengeso, mwomwo vapwile vakutenga kaha namalolwa.

Oloze vaze “vaka-kuyoya” vawana amwene Ezekele muchakumwenesa kavapwile vamalengesoko. Echi chasolola chihandwa chachinene chikuma. Vyakumwenesa kana vyamukwachile chikuma kumuchima, ngocho chamulingishile avuluke ava vaka-kuyoya mapapa 18 mukapetulu watete mumukanda wenyi. (Ezeke. 1:5-22) Ezekele atela alikomokelele chikuma hakumona omu vaze vaka-kuyoya vawana vapwile nakutambuka hamwe mukulonga mwishi yalitanda lyaKalunga, echi chamulingishile atachikize ngwenyi Yehova ikiye atwama nangolo havyuma vyakutenga vyosena. Namakumbi ano chakumwenesa kana cheji kutulingisanga tulikomokele chikuma hangolo naunene atwama nawo Yehova, nomu wata wenyi wapwa wakulitulaho.—Miji. 1, 29:11.