Yizikeɛle nwunle nlankɛ nyinli mɔɔ lɛ ndɛbalɛ nee awenade mɔɔ lɛ sonla ti mɔɔ bɛze bɛ mgbole la kɛ bɛgyigyi arelemgbunli azua nee ɛzonlenlɛ azua nyunlu kɛ sinzavolɛma. Ɛnee ananze ɛhye mɔ wɔ tete Aselea nee Babelonia. Bie a abɔdeɛ mgbole ɛhye mɔ yɛle ye azibɛnwo. Bie mɔ anwumahɔlɛ le kɛyɛ mita nsia. Noko ɔnva nwo kɛ abɔdeɛ ɛhye mɔ anwo ka ɛzulolɛ la, ɛnee ngoane ɛnle bɛ nu, bɛvale awolɛ a bɛzele a.

Noko abɔdeɛ nna ne mɔ mɔɔ Yizikeɛle nwunle bɛ la le “tease abɔdeɛ.” Ngakyile kpole kpalɛ o! Ɔnyianle Yizikeɛle anwo zo tumi kpole ɔti ɔhanle edwɛkɛ “tease abɔdeɛ” fane mɔɔ bo bulu la wɔ ye ngapezo ne mukenye ne anu. (Yiz. 1:5-22) Tease abɔdeɛ nna ne mɔ mɔɔ bɛkɔ ɛleka ko na bɛwɔ Nyamenle belemgbunli ebia ne abo la maanle Yizikeɛle nwunle ye kɛ Gyihova a kile abɔdeɛ kɔsɔɔti adenle a. Ɛnɛ, ɛnyelɛzodeɛnwunlɛ ko ne ala maa yɛnwu Gyihova kpoleyɛlɛ nee ye tumi yɛɛ kɛzi ye tumililɛ ne kpogya la wienyi.​—1 Ek. 29:11.