Na ini Asiria nanga Babilonia fu owruten sma ben gwenti meki bigi popki fu ston. Den ben meki mankaw di ben abi frei nanga lew di ben abi libisma ede èn den ben poti den na fesi den kownu-oso noso den tempel fu kibri den presi dati. A no de fu taki dati Esekièl ben si den popki fu den meti disi. A ben musu fu fruwondru di a si den, fu di den ben bigi èn sonwan fu den ben hei sowan 6 meter. Ma awinsi fa a ben gersi leki den meti disi ben tranga, toku den no ben de na libi. Den ben meki fu ston.

Ma na ini a fisyun di Esekièl kisi a si fo „libisani”. Dati na wan bigi difrenti nanga den stonpopki di a ben si na Babilon! A fisyun ben abi so furu krakti tapu Esekièl, taki a gebroiki a wortu „libisani” 19 leisi na a bigin fu a buku fu en (Esek. 1:5-22). A fisyun fu den fo libisani di ben e go na a srefi sei na a srefi ten èn di ben de na ondro a kownusturu fu Gado ben sori Esekièl krin taki Yehovah e tiri ala den sani di a meki. Na ini a ten disi a srefi profeititori disi e leri wi taki Yehovah bigi, taki a abi furu makti èn taki en na a Moro Hei Tiriman.​—1 Kron. 29:11.