Ezekiyeli wakwenera kuti wakawonapo kale vithuzi vikuru vya ng’ombe na nkhalamu zakuchita kuŵaja izo ŵakaziŵikanga pa nyumba zachifumu na matempile nga mbalinda. Vithuzi vyanthena ivi vikaŵa na visko vya munthu kweniso vikaŵa na mapapindo. Kale ku Asiriya na Babuloniya vithuzi ivi vikasangikanga mu malo ghanandi. Ezekiyeli wakwenera kuti wakazizikikanga chomene kuwona vithuzi vikuru ivi. Vinyake vikaŵanga vitali pafupifupi mamita 6 (mafiti 20). Nangauli vithuzi ivi vikawonekanga vyankhongono na vyakofya, kweni vikathutanga yayi, vikaŵa waka malibwe ghakuŵaja.

Kweni vilengiwa vinayi ivyo Ezekiyeli wakawona mu mboniwoni vikaŵa “vyamoyo.” Iyi yikaŵa mphambano yikuru nadi! Ivyo Ezekiyeli wakawona vikamuzizika chomene mwakuti wakazunura mazgu ghakuti “vyamoyo” maulendo 11 pakwamba kulemba uchimi wake. (Ezek. 1:5-22) Mboniwoni ya vyamoyo vinayi ivyo vikendanga lumoza kulazga ku malo ghamoza musi mwa chitengo cha Chiuta, yikamovwira Ezekiyeli kumanya kuti Yehova ndiyo wali na mazaza ghose pa chilengiwa chose. Mazuŵa ghano napo, mboniwoni iyi yikutovwira kuwona kuti Yehova ni mukuru kweniso kuti muwuso wake ngwauchindami.—1 Mid. 29:11.