Sigurado nga nakakita na hi Ezekiel hin dagku gud nga eskultura han may pako nga mga todo nga baka ngan mga leon nga may ulo hin tawo nga nagbabantay ha prente han mga palasyo ngan templo. An sugad nga mga estatwa makikita ha kadaan nga Asirya ngan Babilonia. Pariho han ngatanan nga nakakita hito, sigurado nga nahipausa hiya hiton dagku gud nga mga linarang, nga an iba naabot hin haros 20 piye an kahitaas. Pero bisan kon gamhanan gud pagkit-on ito nga mga linarang, waray ito kinabuhi, gin-ukit la tikang ha bato.

Ha kabaliktaran, an upat nga linarang nga nakita ni Ezekiel ha bisyon “buhi nga mga linarang.” Daku gud ito nga kaibahan! Diri gud ito makalimtan ni Ezekiel salit gin-unabi niya an mga pulong nga “buhi nga mga linarang” hin 11 ka beses ha tinikangan han iya tagna. (Ezek. 1:5-22) An bisyon mahitungod han upat nga buhi nga linarang nga urosa nga nagios ha ubos han trono han Dios sigurado nga nagpasilsil gud kan Ezekiel nga bug-os nga kontrolado ni Jehova an ngatanan nga linarang. Yana, iginpapasilsil liwat ha aton hito nga bisyon an pagkaharangdon ngan pagkagamhanan ni Jehova ngan an pagkamahimayaon han iya pagkasoberano.​—1 Cron. 29:11.