Biblian qellqata profecianakasa, kunanakatï pasawayki ukanakasa, Jesusajj 1914 maran reyit uttʼayasitapwa uñachtʼayi. Uka maranwa Supayan apnaqata akapachan qhep qhepa urunakapajj qalltawayi. ¿Kunsa Jesusajj reyit uttʼayatäsajj luräna? ¿Jankʼakit Diosan servirinakaparojj Jachʼa Babiloniat qhespiypachäna? ¿1914 maranti ‘suma phoqeri amuyasir esclavorojj’ uttʼaypachäna? ¿Uka maranti Jesusajj cosecha tiempo qalltaypachäna? (Mat. 24:45).

Janiwa. Apóstol Pedrojj Diosan amuytʼayatäsajja, juzgañatak tiempojj “Diosan utapampiw” nayraqat qalltani sasaw qellqäna (1 Ped. 4:17). Uka toqet parlkasajja, kunapachas Jehová Diosajj ‘pacton yatiyiripampi’, mä arunjja Yoqapampi utapar jutañapäkäna ukwa Malaquías profetajj arsurakïna (Mal. 3:1-5). Uka tiemponwa servirinakapajj yantʼatäpjjañapäna qʼomachatäpjjañaparakïna. ¿Uka profecianakajj phoqasipunïnti?

 Phoqasïnwa. 1914 marat 1919 mara qalltakamajja, Estudiantes de la Biblia sasin uñtʼatäpkäna uka jilat kullakanakajj yantʼataw uñjasipjjäna, qʼomachatäpjjarakïnwa. 1914 maran akapachan tukusiñap suyapkäna uka jilat kullakanakat waljanejja, jan phoqasitap uñjasajj wali chuyma ustʼatäpjjänwa. 1916 maran Charles Russell jilatan jiwatapatjja, jukʼamp chuyma ustʼatäpjjänwa, uka jilataw Diosan markaparojj taqe chuyma pʼeqtʼäna. Russell jilatar jukʼamp munasipkäna uka jilat kullakanakajja, Joseph Rutherford jilat contraw saytʼapjjäna. Rutherford jilataw Russell jilatan jiwatapat Diosan markapar pʼeqtʼjjäna. Diosan markapajj janiw mayachtʼatäjjänti, 1917 maran niyaw tʼaqjtapjjäna. 1918 maransti, Rutherford jilatampiru paqallqo yanapirinakapampiru ina chʼusat juchañchasiñapatakiw religión pʼeqtʼirinakajj autoridadanakar chʼamañchapjjäna, ukhamatwa uka jilatanakajj carcelan llawintatäpjjäna. Brooklyn markan central mundialajj utjkäna ukas jistʼantatäjjänwa. Taqe ukanak pasatapajja, Diosan markapajj Jachʼa Babiloniampi apnaqatäskakitapwa uñachtʼayäna.

Ukampis 1919 maranjja, taqe kunaw akatjamat mayjtʼäna. ¿Kunas pasäna? Uka mara qalltajja, Rutherford jilatampi yanapirinakapampiw carcelat mistjjapjjäna. Ukatjja jankʼakiw mä asamblea wakichapjjäna, uka asambleajj jichhakamas wali amtatawa. Ukatsti, campañanakan predicañataki mä machaq qellqat lurañwa qalltapjjäna, uka qellqatajj The Golden Age sat revistawa (jichhajj ¡Sartapjjañäni! satäjjewa). Jilat kullakanakan predicapjjañapatak chʼamañchañatakisa, pʼeqtʼirinakaw congregacionanakan uttʼayasïna. Predicacionajj suma organizatäñapatakejja, uka pachpa mararakiw Bulletin sat qellqatajj mistüna (jichhajj Cristianjam Jakañataki ukat Yatiyañataki: Tantachäwin yatjjatañataki satäjjewa).

¿Kunjamas ukanakajj lurasïna? Jesusaw Diosan servirinakaparojj Jachʼa Babiloniat salväna, suma phoqeri amuyasiri esclavorus uttʼayarakïna, ukajj qhanaw amuyasïna. Cosecha apthapiñ horasas qalltjjänwa. 1919 maratwa Diosan markapajj nayrar sartaski.