Akka surirang na di Bibel dohot sejarah patuduhon Jesus nungnga mamaretta gabe Raja di surgo taon 1914. Mulai sian i, nungnga mulai be akka ari parpudi ni portibi ni Sibolis. Aha do na parjolo diulahon Jesus dung gabe Raja ibana? Pittor dipalua ibana do naposo ni Debata sian Babel na Balga? Manang parjolo do dipillit ibana “naposo haposan” i taon 1914 dung i dimulai ibana ulaon panen na balga i?​—Mat. 24:45.

Dang i dope na diulahon ibana. Ingot ma, disurirangkon Apostel Petrus do molo panguhuman i lao masa ‘parjolo sian jabu ni Debata’. (1 Ptr. 4:17) Disurirangkon Panurirang Maleaki do muse na lao ro Jahowa tu bagas jorona i rap dohot “utusan parjanjian”, i ma Anak ni Debata. (Mal. 3:1-5) Di tikki i, dipabadia ma naposo ni Debata jala diuji. Sesuai do akka na masa i tu surirang i? Sesuai! Aha buktina?

 Sejarah patuduhon mulai sian taon 1914 sahat tu mula ni taon 1919, diuji jala dipabadia ma akka Parsiajar Bibel, goar ni Saksi Jahowa di tikki i. Taon 1914, godang do naposo ni Debata na kecewa ala dang ro dope ujung ni portibi di taon i songon na dipaima nasida. Lam kecewa do nasida muse taon 1916, ala mate si Charles T. Russell, na mamimpin naposo ni Debata di tikki i. Piga-piga halak palobihu do pasangappon donganta si Russel. Alani i, gabe dang olo nasida mangihutton tudu-tudu ni si Joseph F. Rutherford, na manggattihon si Russel. Gabe hampir tarbagi ma organisasi taon 1917. Dung i taon 1918, alani tuduhan ni akka pamimpin agama gabe dipenjarahon ma si Rutherford dohot pitu donganna. Ditutup ma Kantor Pusat na di Brooklyn. Takkas ma dang malua dope naposo ni Debata sian Babel na Balga di tikki i!

Alai hatop do muba sude taon 1919. Di mula ni taon i, dipalua ma si Rutherford dohot akka donganna sian penjara. Pittor karejo ma nasida! Dang leleng dukkon i, dibahen ma sada pengaturan asa dibahen kebaktian. Jala diterbitton sada majalah na baru na margoar The Golden Age, (saonari digoari Dungo ma!). Majalah on dibahen lao dipakke di ulaon marbarita. Dung i di ganup huria, dipillit ma sahalak pengawas na mangatur jala na mangurupi ulaon marbarita. Jala diterbitton do muse Bulletin (saonari digoari Hangoluan dohot Pangkobasion ni Halak Kristen—Na Laho Diparsiajari) asa taratur diulahon ulaon marbarita.

Aha ma na boi taida sian akka na masa i? Takkas ma, taon na massai petting do taon 1919. Ai di taon i ma dipalua Kristus naposo ni Debata sian Babel na Balga. Dilantik ibana do naposo haposan jala na marbisuk. Dimulai ibana do ulaon panen i jala hasilna torus lam martamba.