Nubuat Pustaka ras sejarah mbuktiken maka Jesus mulai merentah jadi Raja i surga bas tahun 1914. Mulai paksa si e, ibenai me wari-wari pendungi doni Setan enda. Mis nge ibebaskenna pengikutna arah Babilon si Mbelin? Ipilihna nge “budak si setia ras pentar” bas tahun 1914? Janah imulaina nge dahin mpepulung peranin?​—Mat. 24:45.

Lang. Rasul Petrus ernubuat maka penghakimen “imulai arah rumah Dibata.” (1 Pet. 4:17) Nabi Maleaki pe ernubuat maka reh pagi Dibata ku rumah pertotonNa radu ras “utusen perjanjin” eme Anak Dibata. (Mal. 3:1-5) Paksa si e, umat Dibata imurniken janah iuji. Payo nge nubuat-nubuat e terjadi? Payo. Kai buktina?

Sejarah mbuktiken maka mulai tahun 1914 seh ku awal tahun 1919, Ajar-Ajar Pustaka si Badia (penggelaren man Saksi-Saksi Jahwe paksa si e) iuji ras imurniken. Bas tahun 1914, enterem umat Dibata si kecewa perban kedungen doni enda  lenga terjadi bas tahun e bagi si arapken kalak e. Bas tahun 1916, reh kecewana kalak e perban Charles T. Russell mate, padahal ia peminpin umat Dibata paksa si e. Kalak si jadi kel atena ngenen Russell la setuju adi Joseph F. Rutherford si nggantiken ia jadi peminpin. Emaka, turah me persoalen i tengah-tengah umat Dibata janah hampir erban organisasi lanai ersada bas tahun 1917. Kenca si e, bas tahun 1918, banci saja perban ipengaruhi peminpin-peminpin Gereja, Rutherford ras pitu temanna iadili janah ikataken ersalah. Dungna ipenjaraken kalak e, Kantor Pusat i Brooklyn pe itutup. Enda buktina maka umat Dibata lenga ibebasken arah Babilon si Mbelin.

Kai si terjadi bas tahun 1919? Keadanna rempet kel berubah. Bas awal tahun e, Rutherford ras teman-temanna ibebasken arah penjara. Mis kalak e erdahin mulihi. La ndekah kenca si e, iban me pengaturen guna erban kebaktin si jadi sejarah. Iban ka pengaturen gelah iterbitken majalah si mbaru The Golden Age (gundari igelari majalah Perdiatekenlah!). Majalah enda iban gelah ipake bas dahin erberita. Kenca si e, sekalak pengawas ipilih bas tiap runggun guna ngaturken dahin erberita janah mereken semangat man perberita. Gelah dahin erberita banci ratur, iterbitken me Bulletin (gundari ikataken Pelayanen ras Kegeluhen Kristen—Agenda Perpulungen).

Kai kesimpulenna? Jelas me, tahun 1919 eme tahun si penting. Bas tahun e bebasken Kristus pengikutna arah Babilon si Mbelin janah ipilihna budak si setia ras pentar. Selain si e, mulai ka ibenaken dahin mpepulung peranin janah pendahin e terus reh belinna.