Ang tagna sa Bibliya ug ang kasaysayan klarong nagpakita nga si Jesus nagsugod pagmando ingong Hari sa langit niadtong 1914, nga nagpaila sa pagsugod sa kataposang mga adlaw sa sistema ni Satanas dinhi sa yuta. Unsay gihimo ni Jesus dihang nahimo siyang Hari? Gipagawas ba niya dihadiha ang iyang mga alagad sa yuta gikan sa pagkabihag sa Bantogang Babilonya? Iya bang gitudlo ang iyang “matinumanon ug maalamong ulipon” niadtong 1914 ug gisugdan ang dakong buluhaton sa pagpangani?​—Mat. 24:45.

Klaro nga dili ingon niana ang kahimtang. Hinumdomi nga si apostol Pedro gigiyahan sa pagsulat nga ang paghukom “magsugod sa balay sa Diyos.” (1 Ped. 4:17) Sa susama, si propetang Malaquias nagtagna sa panahon nga si Jehova moabot sa Iyang balay sa pagsimba uban ang “mensahero sa pakigsaad,” ang Anak sa Diyos. (Mal. 3:1-5) Kanang panahona maoy yugto sa pagdalisay ug pagsulay. Uyon ba ang kasaysayan sa maong tagna?

 Oo! Ang yugto sugod sa 1914 hangtod sa sayong bahin sa 1919 maoy lisod nga panahon sa pagsulay ug pagdalisay alang sa mga Estudyante sa Bibliya, nga maoy pagtawag kaniadto sa mga Saksi ni Jehova. Sa 1914, daghan sa katawhan sa Diyos ang nadismayar dihang ang kataposan sa sistema wala moabot sumala sa ilang gilaoman. Mas migrabe ang maong pagbati niadtong 1916 pagkamatay ni Charles T. Russell, nga maoy madasigong nanguna sa katawhan sa Diyos niadtong panahona. Ang uban nga suod kaayo ni Brader Russell mibabag sa mga paningkamot ni Joseph F. Rutherford, nga maoy mipuli kang Russell sa pagpanguna. Dihay pagkabahinbahin sa organisasyon ug hapit kining mabungkag niadtong 1917. Unya sa 1918, dayag tungod sa pagsulsol sa mga klero, si Brader Rutherford ug pito sa iyang mga kauban gihusay sa korte, sayop nga gisentensiyahan, ug gipriso. Ang hedkuwarter sa Brooklyn gisirad-an. Tin-aw nga ang katawhan sa Diyos wala pa pagawsa gikan sa Bantogang Babilonya!

Apan unsay nahitabo niadtong 1919? Kalit kaayong nausab ang kahimtang! Sa sayong bahin nianang tuiga, gibuhian si Rutherford ug ang iyang mga kauban. Ug sila mibalik dayon sa ilang buluhaton! Giplano dayon ang usa ka importanteng kombensiyon, ug gitrabaho ang usa ka bag-ong publikasyon, ang The Golden Age, (karon Pagmata!). Kining bag-ong magasin gidisenyo alang sa mga kampanya sa pagsangyaw. Dugang pa, gitudlo ang usa ka tigdumala sa matag kongregasyon sa pag-organisar ug pagpasiugda sa ministeryo. Sa maong tuig, gipatik sab ang Bulletin (karon ang Atong Kristohanong Kinabuhi ug Ministeryo​—Workbook sa Tigom) sa pagtabang sa pag-organisar sa buluhatong pagsangyaw.

Unsay nahitabo? Tin-aw nga gipagawas na sa Kristo ang iyang katawhan sa pagkabihag sa Bantogang Babilonya. Iya nang gitudlo ang iyang matinumanon ug maalamong ulipon. Ang buluhatong pagpangani gisugdan na. Sukad nianang importanteng tuig sa 1919, makapahingangha ang pag-uswag sa maong buluhaton.