E oti man te taetae ni burabeti n te Baibara ao man rongorongon rimoa bwa e moana ana tautaeka Iesu bwa te Uea i karawa n 1914, are e a kanikinaea iai moanakini kabaneani bongin ana waaki Tatan n te aonnaba. Tera are e karaoia Iesu n rikina bwa te Uea? E a kainaomataia naba ngkekei ana toro aika n te aonnaba mani Baburon ae Kakannato? E rinea ana “toro ae kakaonimaki ma ni wanawana” n 1914 ao e a moana naba te mwakuri n tai ae kakannato?​—Mat. 24:45.

E aki. Uringnga are e kairaki te abotoro Betero bwa e na korea te motikitaeka aei bwa e na “moa mairouia kaain ana auti te Atua.” (1Bet. 4:17) N aron naba anne, e a kaman taekina te tai te burabeti ae Maraki are e na roko iai Iehova n Ana auti ae tataromauriaki iai n raonaki iroun “te tia uota taekan te berita,” ae Natin te Atua. (Maraki 3:​1-5) Bon te tai ni kaitiakaki ao ni kataaki te tai anne. E boraoi rongorongon rimoa ma baika kaotaki n te taetae ni burabeti aei?

 Eng! Te tai ae moanaki man 1914 nakoni moan 1919 bon te tai ae kangaanga are a kataaki iai ao ni kaitiakaki Taan Reirei n te Baibara, are a ataaki imwina bwa Ana Tia Kakoaua Iehova. N 1914 ao a bati ana aomata te Atua n te aonnaba ake a bwara nanoia ngke e aki roko tokin te waaki ae ngkai n aron are a kantaningaia. E a korakora riki bwaran nanoia n 1916 ni maten Charles T. Russell, are kairiri i buakoia ana aomata te Atua ma te ingainga. Tabeman ake a rangi ni kaan ma Brother Russell, a a kakaitaraa ana mwakuri korakora Joseph F. Rutherford are onea mwin Russell ni kairiri. E a boo te iraraure ao e a kuri ni bwenaua ara botaki n 1917. Ao n 1918, a a kataaki Brother Rutherford ma raona ake itiman, a bukinaki n te aro ae kairua, ao ni kamatawarikaki. E oti bwa e riki anne man aia kairoro mataniwi n Aaro. E kainaki naba kautun ara botaki i Brooklyn. E teretere iai bwa a tuai ni kainaomataaki ana aomata te Atua mani Baburon ae Kakannato!

Ma tera are e riki n 1919? A a bitaki bwaai n te aro ae kaminonano! Ni moan te ririki anne ao a a kabwaraaki man te karabuuti Rutherford ma raona ni beku. Ao a a bon oki naba ni mwakuri! E waekoa ni baireaki karaoan te bwabwaro ae kakawaki ao te boki ae boou ae The Golden Age, (ai te Taratara! ngkai). E karaoaki te boki aei bwa buokan te mwakuri ni minita nakoia aomata nako. A rineaki naba mataniwi n te ekaretia n tatabeua nako ibukini bairean ao boutokaan te mwakuri ni minita. N te ririki naba anne ao e boreetiaki te Bulletin (ai Te Boki n Reirei ae Maiura ni Kristian ao Ara Mwakuri ni Minita ngkai) ibukini buokani bairean te mwakuri n uarongorongo.

Tera ae e a tia n riki? E teretere bwa e a tia Kristo ni kainaomataia ana aomata mani kataenikaiaia irouni Baburon ae Kakannato. E a tia n rinea ana toro ae kakaonimaki ma ni wanawana. E a waaki ngkai te mwakuri n tai. Ni moa man te ririki ae kakawaki ae 1919, ao e a tia ni waakinaki te mwakuri n te aro ae rangi ni kamimi.