Bambikudulu ya Biblia mpi istware ke monisa kibeni nde Yezu yantikaka kuyala bonso Ntotila na zulu na 1914, yo monisaka luyantiku ya bilumbu ya nsuka ya nsi-ntoto ya Satana. Inki Yezu salaka ntangu yandi kumaka Ntotila? Keti yandi katulaka na mbala mosi bansadi ya Nzambi yina vandaka na ntoto na kimpika na Babilone ya Nene? Keti yandi tulaka “mpika ya kwikama mpi ya mayele” na 1914 mpi yantikaka kisalu ya nene ya kukatula bambuma?—Mat. 24:45.

Ve. Kuvila ve nde ntumwa Piere sonikaka na nsadisa ya mpeve santu nde lusambisu ta yantika “na nzo ya Nzambi.” (1 Pie. 4:17) Mutindu mosi, profete Malaki tubilaka ntangu yina Yehowa ta kwisa na nzo na yandi ya lusambu ti “kinati-nsangu ya kuwakana,” disongidila Mwana na yandi. (Mal. 3:1-5) Ntangu yina ta vanda ntangu ya kutomisa mpi ya kumeka. Keti mambu ya istware ke wakana ti mambu yina bambikudulu yai tubilaka?

 Ee! Banda na 1914 tii na luyantiku ya 1919, balongoki ya Biblia, mutindu bo vandaka kubinga Bambangi ya Yehowa, kotaka na nsungi ya mpasi yina bo yantikaka kumeka mpi kutomisa bo. Na 1914, bansadi ya Nzambi mingi na ntoto waka mpasi sambu nsuka ya nsi-ntoto kwisaka ve mutindu bo vandaka kuyindula. Mpasi yina kumaka ngolo na 1916, ntangu Charles T. Russell, yina vandaka kutwadisa ti kikesa yonso bansadi ya Nzambi, fwaka. Bantu ya nkaka yina kangamaka ngolo na Mpangi Russell buyaka kibeni kulanda lutwadisu ya Joseph F. Rutherford, yina yingaka Russell bonso ntwadisi. Na 1917, kukabwana kotaka na dibundu. Diaka, na 1918, bamfumu ya mabundu fundaka Mpangi Rutherford ti banduku na yandi nsambwadi, bo sambisaka bo, bo bedisaka bo na mambu ya luvunu, mpi bo tulaka bo na boloko. Bo kangaka Babiro na beto yina vandaka na Brooklyn. Yo ke pwelele nde bansadi ya Nzambi katukaka ntete ve na kimpika ya Babilone ya Nene!

Ebuna nki salamaka na 1919? Mambu sobaka nswalu kibeni! Na luyantiku ya mvula yina, bo basisaka Mpangi Rutherford ti banduku na yandi na boloko. Mpi na mbala mosi bo vutukilaka kisalu na bo! Ntangu fioti na nima, bo salaka lukutakanu mosi ya nene, mpi bo basisaka zulunalu mosi ya mpa, L’Âge d’Or, (bubu Telama!). Bo basisaka zulunalu yai ya mpa sambu na kulonga na bisika ya bantu mingi. Diaka, na konso dibundu bo tulaka nkengi mosi yina vandaka kuyidika mpi kusiamisa bantu na kusala kisalu ya kusamuna. Kaka na mvula yina, bo basisaka Bulletin (bubu Mukanda ya Lukutakanu Luzingu mpi Kisalu na Beto ya Bukristu) sambu na kusadisa bampangi na kuyidika kisalu ya kusamuna.

Inki salamaka? Yo kele pwelele nde Kristu me katulaka bansadi na yandi na kimpika ya Babilone ya Nene. Yandi me tulaka mpika na yandi ya kwikama mpi ya mayele. Kisalu ya kukatula bambuma me yantikaka. Banda na mvu 1919, kisalu yai ke kwendaka kaka na ntwala na mutindu ya kuyituka kibeni.