Ũrathi wa Bibilia o hamwe na historĩ cionanagia wega atĩ Jesu aambĩrĩirie gwathana arĩ Mũthamaki igũrũ mwaka wa 1914, na ũndũ ũcio nĩguo warĩ kĩambĩrĩria kĩa matukũ ma kũrigĩrĩria ma mũtabarĩre ũyũ wa Shaitani gũkũ thĩ. Hihi nĩ ũndũ ũrĩkũ Jesu eekire atuĩka Mũthamaki? Hihi nĩ aakũũrire ndungata ciake cia gũkũ thĩ kuuma ũkombo-inĩ wa Babuloni Ũrĩa Mũnene o hĩndĩ ĩyo? Hihi nĩ aamũrire “ngombo ĩrĩa njĩhokeku na njũgĩ” mwaka wa 1914 na akĩambĩrĩria wĩra mũnene wa magetha?—Mat. 24:45.

Aca. Ririkana atĩ mũtũmwo Petero nĩ aatongoririo nĩ Ngai kwandĩka atĩ ituĩro rĩngĩambĩrĩirie “na nyũmba ya Ngai.” (1 Pet. 4:17) O nake mũnabii Malaki nĩ aarathire ũhoro wa ihinda rĩrĩa Jehova angĩgooka thĩinĩ wa nyũmba Yake ya ũthathaiya arĩ hamwe na “mũtũmwo wa kĩrĩkanĩro,” nĩwe Mũrũ wa Ngai. (Mal. 3:1-5) Rĩu rĩngĩarĩ ihinda rĩa gũtherio na  kũgerio. Hihi historĩ nĩ ĩtwaranaga na maũndũ macio ma ũrathi?

Ĩĩ nĩ ĩtwaranaga! Ihinda rĩa kuuma 1914 nginya kĩambĩrĩria-inĩ kĩa 1919 rĩarĩ ihinda iritũ rĩa kũgerio na gũtherio harĩ Arutwo a Bibilia, ta ũrĩa Aira a Jehova meetagwo hĩndĩ ĩyo. Mwaka-inĩ wa 1914, andũ aingĩ a Ngai gũkũ thĩ nĩ maakuire ngoro tondũ mũico wa mũtabarĩre ũyũ ndwakinyire ta ũrĩa meerĩgagĩrĩra. Mwaka-inĩ wa 1916, nĩ maakuire ngoro o na makĩria thutha wa gĩkuũ kĩa Charles T. Russell, ũrĩa watongoragia maũndũ na njĩra nene gatagatĩ-inĩ ka andũ a Ngai. Andũ amwe arĩa meendete mũno ũtongoria wa Mũrũ wa Ithe witũ Russell nĩ maareganire na maũndũ marĩa meekagwo nĩ Joseph F. Rutherford, ũrĩa wacokire ithenya rĩa Russell harĩ gũtongoria. Nĩ kwagĩire na ngayũkano ciarĩ hakuhĩ kũrehe nyamũkano ithondeka-inĩ mwaka wa 1917. Thutha ũcio mwaka-inĩ wa 1918, Mũrũ wa Ithe witũ Rutherford hamwe na ariũ a Ithe witũ angĩ mũgwanja nĩ maanyitirũo, magĩtuĩrũo na njĩra ĩtarĩ ya kĩhooto na magĩikio njera. Wabici nene ĩrĩa yarĩ Brooklyn ĩkĩhingwo. Hatarĩ nganja, andũ a Ngai matiakũũrĩtwo kuuma kũrĩ Babuloni Ũrĩa Mũnene!

No rĩrĩ, hihi nĩ ũndũ ũrĩkũ wekĩkire mwaka wa 1919? Maũndũ maacenjirie na ihenya mũno! Kĩambĩrĩria-inĩ kĩa mwaka ũcio, Rutherford hamwe na ariũ a Ithe witũ acio angĩ nĩ moohorirũo kuuma njera. Na magĩcoka wĩra-inĩ wao o hĩndĩ ĩyo! Thutha wa kahinda kanini, gũkĩbangwo kĩgomano kĩa mwanya, na gũgĩtuĩka atĩ ngathĩti njerũ ya The Golden Age, (ĩrĩa rĩu ĩtagwo Arahũkai!) nĩ ĩkwambĩrĩria gũcabagwo. Muoroto wa ngathĩti ĩyo njerũ warĩ gũteithĩrĩria wĩra-inĩ wa kũhunjia kũndũ kwa mũingĩ. Makĩria ma ũguo, thĩinĩ wa o kĩũngano nĩ kwaamũrirũo mũrori wa kũbanga na gũteithĩrĩria harĩ wĩra wa ũtungata. Mwaka o ũcio, nĩ gwacabirũo Bulletin (ĩrĩa rĩu ĩtagwo Kabuku ka Mũcemanio wa Ũtũũro na Ũtungata Witũ wa Gĩkristiano) nĩguo ĩteithĩrĩrie harĩ kũbanga wĩra wa kũhunjia.

Kaĩ gwathiĩte atĩa? Hatarĩ nganja, Kristo nĩ aakũũrĩte andũ ake kuuma kũrĩ Babuloni Ũrĩa Mũnene. Nĩ aamũrĩte ngombo yake ĩrĩa njĩhokeku na njũgĩ. Wĩra wa magetha nĩ waambĩrĩirie. Kuuma mwaka ũcio wa mwanya wa 1919, wĩra ũcio ũthiĩte na mbere na gĩkĩro kĩnene mũno.