Bungauzhi bwa mu Baibolo ne bintu byamwekele bimwesha kuba’mba Yesu waikajile Mfumu mwiulu mu 1914, kabiji kyo kimye kyatendekele moba apelako a ino ntanda ya kwa Satana. Ñanyi bintu byaubile Yesu byo aikajiletu Mfumu? Nanchi wafikenejiletu kufumya bakalume banji mu buzha mu Babilona Mukatampe nyi? Nanchi watongwele “kalume wakishinka kabiji wa maana” mu 1914 ne kutendeka mwingilo mukatampe wa kunowa nyi?—Mat. 24:45.

Kechi byo kyajinga ne. Vulukai kuba’mba mutumwa Petelo bamutangijile na mupashi kunemba kuba’mba bunchibamambo ‘bukatendekela mu nzubo ya Lesa.’ (1 Pe. 4:17) Kabiji ngauzhi Malakai naye waambijile jimo amba Yehoba ukeya ku nzubo yanji ya kumupopwelamo na “muluwe wa lulayañano,” aye Mwana Lesa. (Mala. 3:1-5) Kino kyajinga kimye kya kutokesha ne kweseka bantu banji. Nanchi bintu byamweka pa myaka yapitapo bimwesha kuba’mba buno bungauzhi bwafikile nyi?

 Ee. Kutendeka mu mwaka wa 1914 kufika ku ntendekelo ya mwaka wa 1919, Bakamonyi ba kwa Yehoba batelwanga pa kyokya kimye amba Bafunda Baibolo bapichile mu meseko avula kabiji bebatookeshe. Mu mwaka wa 1914, bantu ba Lesa bavula balefwilwe bingi mambo mpelo yo baketekejilenga kechi yaishile ne. Kabiji Charles T. Russell byo afwile mu 1916, bantu balefwilwe bingi mambo ye watangijilanga bantu ba Lesa. Bamo bakijilemo kutemwa Mulongo Russell bakaine kukookela Joseph F. Rutherford, watendekele kutangijila bantu ba Lesa. Byo kyafikilenga mu 1917, jibumba ja Lesa jaabenejilemo. Mu 1918, bantangi ba bupopweshi balengejile Mulongo Rutherford ne balunda nanji 7 kwibamanyika, kwibapamo mambo a bubela ne kwibakasa mu kaleya. Ofweshi mukatampe wajinga mu Brooklyn bamushinkile. Kwa kubula nangwa kuzhinaukatu ne, bantu ba Lesa bakijinga mu buzha mu Babilona Mukatampe.

Ñanyi bintu byamwekele mu 1919? Bintu byapimpwilwe nobe mukukopatu kwa jiso. Ku ntendekelo ya uno mwaka, Mulongo Rutherford ne balunda nanji bebafuminye mu kaleya kabiji batwajijile na mwingilo. Palutwe kacheche, banengezhe kushonkena kwayile bingi nkuwa kabiji magazini wa katataka wa The Golden Age, (ye tutela luno amba Labainga!) walupwilwe. Uno magazini bamwingijishenga pa kusapwila ku mvula bantu. Kabiji mu bipwilo byonse batongwelenga kalama wa kutangijila mwingilo wa kusapwila. Mu yenka uno mwaka, banembele ne Bulletin (ye tutela luno amba Mutanchi wa Kupwila kwa—Bwikalo ne Mwingilo Wetu wa Bwina Kilishitu) wa kwibakwasha kuyuka bya kusapwila.

Bino byonse byamwesheshengatu patoka kuba’mba Kilishitu wafuminye bantu banji mu buzha mu Babilona Mukatampe. Watongwele kalume wa kishinka kabiji wa maana. Kabiji mwingilo wa kunowa watendekele. Kufumatu mu 1919, uno mwingilo ubena kuyilakotu palutwe.