Bupolofeto bwa mu Bible ne mānga bilombola’mba Yesu washilwile kubikala mūlu bu Mulopwe mu 1914, kino kyaikele bu kiyukeno kya ngalwilo ya mafuku a mfulo a ngikadilo ya Satana pano panshi. Le Yesu walongele bika pa kupwa kubikala bu Mulopwe? Le wanyongolwele kiponka na ponka bengidi bandi ba pano pa ntanda mu bupika bwa Babiloni Mukatampe? Lelo watongele kala “umpika mukōkele ne mudyumuke” mu 1914 ne kushilula mwingilo mukatampe wa mwangulo?​—Mat. 24:45.

Ke amopo. Vuluka, mutumibwa Petelo wāpelwe bukomo bwa mushipiditu alombole amba butyibi ‘bukashilwila pa njibo ya Leza.’ (1 Pe. 4:17) Muswelo umo onka, mupolofeto Malaki wālaile kitatyi kikāya Yehova ku njibo Yandi ya butōtyi pamo na “mukendi wa kipwano,” ke Mwanā Leza kadi. (Mal. 3:1-5) Kino kitatyi kyādi kya kwikala kitatyi kya kusubulwa ne kutompibwa. Le mānga i mikwatañane na bino bilombwelwe mu bupolofeto?

 I amo! Kitatyi kya tamba 1914 kutūla ku ngalwilo kwa 1 919 kyadi kitatyi kikomo kya matompo ne kya kusubulwa kwa Befundi ba Bible, bayukene mwenda mafuku bu Batumoni ba Yehova. Mu 1914 bantu ba Leza bavule pano pa ntanda batyumukilwe mutyima kepafikilepo mfulo ya ino ngikadilo na mobadi balangila. Batyumukīle’ko mutyima bininge mu 1916, pafwile Tutu Charles Russell, mwine wadi mwendeji mukankamane wa bantu ba Leza. Bantu bamo badi balamete bipite’byo kipimo Tutu Russell balwile bukomo bwadi bulonga Tutu Joseph Rutherford, mwine wapingakene Tutu Russell. Kwaikala kwilalulula ne bulongolodi bwelalulula mu 1917. Kupwa, mu 1918, mobimwekela na bunwanwa bwa bakatampe ba bipwilo, Tutu Rutherford ne bapwani nandi basamba-babidi basambilwa, baponejibwa bya bubela, ne kukutwa. Kité kya ntanda yonso mu Brooklyn kyashitwa. Na bubine, bantu ba Leza badi kebanyongolwelwe mu Babiloni Mukatampe!

Penepa i bika byalongekele mu 1919? Bine, bintu byashintyile bukidibukidi! Ku ngalwilo kwa mwine mwaka’u, Tutu Rutherford ne bapwani nandi bakutululwa. Bajokela monka ku mwingilo wabo! Kepaijijepo, kwateakanibwa kitango kimo kya kasekuseku, kadi kwadi kutengelwe kulupulwa kwa julunale mupya L’Âge d’Or, (dyalelo i Langukai!). Uno julunale walupwilwe mwanda wa kulonga nandi kampanye mu busapudi bwa bantu bavule. Kadi, mu kipwilo ne kipwilo mwatongelwe mutadi wa kuteakanya ne kwimanina mwingilo wa busapudi. Mu uno mwaka umo onka, kwalupwilwe Bulletin (dyalelo i Kabuku ka ku Kupwila—Būmi ne Mwingilo Wetu wa Bwine Kidishitu) mwanda wa kukwasha kuteakanya mwingilo wa busapudi.

Le i bika byalongekele? Na bubine, Kidishitu wanyongolwele bantu bandi mu bumisungi mu Babiloni Mukatampe. Watongele umpika wandi mukōkele ne mudyumuke. Mwingilo wa mwangulo wadi ukyendelela. Tamba mu uno mwaka mukatampe wa 1919, mwingilo wendelelanga kumeso mu muswelo utulumukwa.